បណ្ដាអ្នកនយោបាយ មន្ត្រីយោធា និងអ្នកការទូតសំខាន់ៗមកពីជុំវិញពិភពលោក បានទៅជួបជុំគ្នានៅទីក្រុង Munich ប្រទេសអាល្លឺម៉ង់ នាថ្ងៃសុក្រ (ទី១៦ ខែកុម្ភៈ) នេះ ដើម្បីចូលរួមសន្និសីទសន្តិសុខ ដែលនឹងត្រូវបានគ្របដណ្តប់ដោយសង្រ្គាមនៅក្នុងប្រទេសអ៊ីស្រាអែល និងអ៊ុយក្រែន ក៏ដូចជាការព្រួយបារម្ភចំពោះការប្តេជ្ញាចិត្តរបស់សហរដ្ឋអាមេរិក ក្នុងការការពារសម្ព័ន្ធមិត្តរបស់ខ្លួន។

អធិការបតីអាល្លឺម៉ង់លោក Olaf Scholz អនុប្រធានាធិបតីអាមេរិកលោកស្រី Kamala Harris និងប្រធានាធិបតីអ៊ុយក្រែនលោក Volodymyr Zelensky ស្ថិតក្នុងចំណោមវត្តមានបណ្ដាមន្ត្រីជាច្រើនរូប ដែលចូលរួមក្នុងសន្និសីទសន្តិសុខទីក្រុង Munich (MSC)។ នេះគឺជាការជួបជុំសកលប្រចាំឆ្នាំដែលផ្តោតលើវិស័យការពារជាតិ និងការទូត។

ប្រធានាធិបតីអ៊ីស្រាអែលលោក Isaac Herzog និងមេដឹកនាំប៉ាឡេស្ទីន លោក Mohammad Shtayyeh ក៏ត្រូវបានរំពឹងថា នឹងចូលរួមផងដែរក្នុងសន្និសីទ ដែលត្រូវចាប់ផ្តើមនៅថ្ងៃទី១៦ ខែកុម្ភៈ ហើយដំណើរការរហូតដល់ថ្ងៃទី១៨ ខែកុម្ភៈ នៅសណ្ឋាគារដ៏ប្រណីត Bayerischer Hof ក្នុងទីក្រុងភាគខាងត្បូងប្រទេសអាល្លឺម៉ង់។

សន្និសីទនេះកើតមានឡើងនៅពេលដែលសង្រ្គាមនៅតំបន់ហ្កាហ្សាស្ទ្រីប រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន ឈានចូលដល់ខែទី៥ ជាមួយនឹងការគ្មានសញ្ញាបញ្ចប់ ដោយការប្រយុទ្ធគ្នានេះ បានធ្វើឲ្យជនជាតិប៉ាឡេស្ទីនជាង ២៨.០០០នាក់ និងជនជាតិអ៊ីស្រាអែលប្រហែល ១២.០០០នាក់ត្រូវបានសម្លាប់។

ភ្លើងសង្គ្រាមនេះក៏ឆាបឆេះឡើងមិនជាយូរប៉ុន្មានផងដែរ នៅមុនការលុកលុយពេញលេញរបស់រុស្ស៊ីលើអ៊ុយក្រែន ចូលដល់ឆ្នាំទី៣ របស់ខ្លួន។ សង្គ្រាមក្នុងប្រទេសទាំង២ នេះ បានបង្កឲ្យមានការភ័យខ្លាច ដែលអាចនឹងត្រូវបានដោះស្រាយ នៅទីក្រុង Munich នេះ អំពីការរាលដាលនៃជម្លោះដែលអាចកើតមាន៕