ភ្នំពេញ៖ ថ្ងៃទី១៦ ខែកុម្ភៈ ឆ្នាំ ២០២៤នេះគឺជាថ្ងៃទី១ នៃការបញ្ចេញរថយន្តក្រុងសាធារណៈ ដើម្បីដឹកប្រជាពលរដ្ឋចេញពីចំណតគោលដៅវត្តភ្នំតាមតម្រាយផ្លូវឆ្ពោះទៅកាន់ចំណតសាកលវិទ្យាល័យជាតិគ្រប់គ្រងសាខាវាលស្បូវ ដែលមានទីតាំងនៅក្នុងមូលដ្ឋានសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញបានឱ្យដឹងថា អនុវត្តន៍តាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងមានការដឹកផ្ទាល់ដោយឯកឧត្តម ឃួង ស្រេង អភិបាលរាជធានីភ្នំពេញឱ្យរថយន្តក្រុងសាធារណៈរាជធានីភ្នំពេញរៀបចំតម្រាយខ្សែរត់ ដើម្បីសម្រួលដល់និស្សិតដែលកំពុងសិក្សានៅសាកលវិទ្យាល័យជាតិគ្រប់គ្រងសាខាវាលស្បូវក៏ដូចជាប្រជាពលរដ្ឋដែលកំពុងរស់នៅក្នុងតំបន់ទីតាំងបុរី ប៉េង ហួត បឹងស្នោរ អាចទទួលបាននូវសេវារថយន្តក្រុងសាធារណៈរាជធានីភ្នំពេញធ្វើដំណើរបាន រដ្ឋាករស្វយ័តដឹកជញ្ជូនសាធារណៈរថយន្តក្រុងបានប្រើប្រាស់តម្រាយផ្លូវចំនួន២ខ្សែសំខាន់ៗ ដោយខ្សែទី១តភ្ជាប់ពីតំបន់ផ្លូវជាតិលេខ១ចូលតំបន់បុរី ប៉េង ហួត ឆ្លងកាត់ចូលទៅសាកលវិទ្យាល័យជាតិគ្រប់គ្រងសាខាវាលស្បូវ រួចត្រឡប់ទៅវិញ ប្រើប្រាស់ផ្លូវតំណរភ្ជាប់នៅក្នុងតំបន់អភិវឌ្ឍន៍កោះនរា និងកោះពេជ្រ ឆ្ពោះទៅកាន់មហាវិថីព្រះមុនីវង្ស រហូតឈានទៅចំណតចុងក្រោយម្តុំសាកលវិទ្យាល័យជាតិគ្រប់គ្រងសាខាវត្តភ្នំ។ 

លោក កែវ ចាន់ណារិទ្ធ បន្ថែមថា ចំណែកខ្សែទី២ តភ្ជាប់ពីចំណតរថយន្តក្រុងរង្វង់មូលកាំភ្លើងគួចកាណុង តាមបណ្តោយមហាវិថីព្រះមុនីវង្ស រហូតដល់តំបន់អភិវឌ្ឍន៍កោះពេជ្រ និងកោះនរា ឆ្លងចូលតាមផ្លូវក្នុងបុរី ប៉េង ហួត បឹងស្នោរ បន្តទៅកាន់សាកលវិទ្យាល័យជាតិគ្រប់គ្រងសាខាវាលស្បូវវិញ ហើយសម្រាប់ការប្រើប្រាស់រថយន្តក្រុងមាន២វេន ដោយវេនទី១ចាប់ផ្តើមពីម៉ោង៥កន្លះព្រឹកក្នុងរយៈពេល១៥នាទីចេញរថយន្ត១គ្រឿង និងវេនទី២ពីថ្ងៃរសៀលរហូតដល់៨កន្លះយប់។ លោកបានបញ្ជាក់បន្ថែមថា តម្រាយផ្លូវ២ខ្សែខាងលើនេះ គឺអាចសម្រួលច្រើនដល់ប្រជាពលរដ្ឋធ្វើដំណើរជាពិសេសសិស្សនិស្សិត ដែលសិក្សានៅក្នុងសាកលវិទ្យាល័យជាតិគ្រប់គ្រងអាចប្រើសេវារថយន្តក្រុងសាធារណៈនេះ៕

អត្ថបទ ៖ ប្រាក់ វ៉ាន់ដា