គណៈប្រតិភូសភាអាមេរិកពីគណបក្សទាំង២ នឹងធ្វើទស្សនកិច្ចនៅប្រទេសហុងគ្រី នាថ្ងៃអាទិត្យចុងសប្ដាហ៍នេះ ខណៈដែលសម្ពាធកំពុងកើនឡើងលើទីក្រុង Budapest ដើម្បីឲ្យផ្តល់សច្ចាប័នលើសមាជិកភាពរបស់ប្រទេសស៊ុយអែត ក្នុងអង្គការណាតូ (NATO) នៅពេលដែលសភាកោះប្រជុំឡើងវិញ បន្ទាប់ពីវិស្សមកាលរដូវរងា។

គួរបញ្ជាក់ថា ហុងគ្រីគឺជាប្រទេសសមាជិកតែមួយគត់របស់អង្គការណាតូដែលមិនផ្តល់សច្ចាប័នលើការស្នើសុំរបស់ស៊ុយអែត ជាដំណើរការដែលតម្រូវឲ្យមានការគាំទ្រពីសមាជិកទាំងអស់ ដោយការមិនយល់ព្រមនោះធ្វើឲ្យប៉ះពាល់ដល់ទំនាក់ទំនងជាមួយសហរដ្ឋអាមេរិក និងបង្កើនការព្រួយបារម្ភក្នុងចំណោមប្រទេសសម្ព័ន្ធមិត្តរបស់ខ្លួន។

ស៊ុយអែតបានដាក់ពាក្យសុំចូលជាសមាជិកអង្គការណាតូ ក្នុងខែឧសភា ឆ្នាំ២០២២ ដោយការធ្វើបែបនេះបានក្លាយជាផ្លាស់ប្តូរជាប្រវត្តិសាស្ត្រ នៅក្នុងគោលនយោបាយ ដែលត្រូវបានជំរុញដោយការលុកលុយរបស់រុស្ស៊ីលើអ៊ុយក្រែន។ នាយករដ្ឋមន្ត្រីហុងគ្រី លោក Viktor Orban ដែលមានទំនាក់ទំនងល្អជាមួយរុស្ស៊ីជាងបណ្ដារដ្ឋសរបស់សហភាពអឺរ៉ុប (EU) ផ្សេងទៀត  និងសមាជិកណាតូភាគច្រើននោះ និយាយថា រដ្ឋាភិបាលរបស់លោកគាំទ្រស៊ុយអែតឲ្យចូលរួមជាមួយសម្ព័ន្ធភាព ប៉ុន្តែច្បាប់នៅតែជាប់គាំង។

ស្ថានទូតអាមេរិកប្រចាំប្រទេសហុងគ្រីបានឲ្យដឹងនៅក្នុងសេចក្តីថ្លែងការណ៍ នៅថ្ងៃសុក្រ (ទី១៦ ខែកុម្ភៈ) នេះថា សមាជិកព្រឹទ្ធសភានឹងធ្វើដំណើរទៅកាន់ប្រទេសហុងគ្រី «ក្នុងបេសកកម្មផ្តោតលើបញ្ហាយុទ្ធសាស្ត្រ ដែលអង្គការណាតូ និងហុងគ្រី កំពុងប្រឈម»។ ឯកអគ្គរដ្ឋទូតអាមេរិក លោក David Pressman បាននិយាយនៅខែនេះថា ការចូលជាសមាជិកអង្គការណាតូរបស់ស៊ុយអែត គឺជាបញ្ហាដែលប៉ះពាល់ដោយផ្ទាល់ដល់សន្តិសុខជាតិរបស់សហរដ្ឋអាមេរិក និងក៏ជាសន្តិសុខនៃសម្ព័ន្ធមិត្តទាំងមូលផងដែរ៕