ស៊ីហ្គេម៖ បន្ទាប់ពីមានការស្នើសុំ ២សប្ដាហ៍ពីម្ចាស់ផ្ទះវៀតណាម ដើម្បីពិភាក្សាជាមួយរដ្ឋាភិបាលរបស់ខ្លួនអំពីការសម្រេចចុងក្រោយ នៃកាលបរិច្ឆេទរៀបចំការប្រកួតកីឡាស៊ីហ្គេមលើកទី៣១ ឆ្នាំ២០២១ ថ្ងៃឱសានវាទនៃការកំណត់ជោគវាសនាស៊ីហ្គេមនៅរដ្ឋធានីហាណូយ នឹងមកដល់នៅថ្ងៃសុក្រ ទី៨ ខែកក្កដា ឆ្នាំ២០២១ ខាងមុខនេះហើយ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានឲ្យដឹងថា ថ្ងៃទី៨-កក្កដាគឺជាថ្ងៃកំណត់ដែលក្រុមប្រឹក្សាកីឡាអាស៊ីអាគ្នេយ៍ តម្រូវឲ្យម្ចាស់ផ្ទះវៀតណាមធ្វើការអនុម័តចុងក្រោយលើសេណារីយ៉ូ ១ ក្នុងចំណោមសេណារីយ៉ូ ២ ដើម្បីរៀបចំការប្រកួតកីឡាស៊ីហ្គេមលើកទី៣១ ឆ្នាំ២០២១ បន្ទាប់ពីវៀតណាមបានស្នើសុំរយៈពេល ១៤ថ្ងៃដើម្បីពិភាក្សាជាមួយរដ្ឋាភិបាលខ្លួនក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ និងជាកិច្ចប្រជុំលើកទី២ ដែលជជែកអំពីជោគវាសនាស៊ីហ្គេមនៅវៀតណាម កាលពីថ្ងៃទី២៤ ខែមិថុនាកន្លងទៅ។ គួរដឹងថា ដោយសារវិបត្តិកូវីដ-១៩ ម្ចាស់ផ្ទះវៀតណាមបានស្នើគណៈកម្មាធិការជាតិអូឡាំពិក នៃបណ្ដាប្រទេសសមាជិកក្រុមប្រឹក្សាកីឡាអាស៊ីអាគ្នេយ៍ ចង់ពន្យារពេលរៀបចំស៊ីហ្គេមឆ្នាំ២០២១ ទៅពាក់កណ្ដាលឆ្នាំ២០២២។
ប៉ុន្តែដោយមិនទទួលបានការគាំទ្រពីបណ្ដាប្រទេសសមាជិកអាស៊ាន វៀតណាមបានកំណត់សេណារីយ៉ូ ៣ ដើម្បីពិភាក្សា និងសម្រេចជាមួយរដ្ឋាភិបាលរបស់ខ្លួន ទី១-រក្សាការប្រកួតនៅដដែល ចាប់ពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១ ទី២-ពន្យារពេលទៅប្រកួតពាក់កណ្ដាលឆ្នាំ២០២២ និងទី៣-ចង់ពន្យារពេលរយៈពេលវែងទៅរៀបចំការប្រកួតនាឆ្នាំ២០២៥ ឬឆ្នាំ២០២៧។ ប៉ុន្តែក្នុងកិច្ចប្រជុំកាលពី ២សប្ដាហ៍មុន រដ្ឋាភិបាលវៀតណាមបានស្នើកាត់សេណារីយ៉ូមួយចេញ គឺផែនការពន្យារពេលទៅឆ្នាំ២០២៥ ឬឆ្នាំ២០២៧ ក្រោយម្ចាស់ផ្ទះបន្តវេន រួមមានថៃ និងព្រុយណេបានអះអាងពីការត្រៀមខ្លួនធ្វើម្ចាស់ផ្ទះរួចរាល់។ ដូច្នេះវៀតណាមនៅសល់ ២ជម្រើសប៉ុណ្ណោះដើម្បីរៀបចំស៊ីហ្គេមឆ្នាំ២០២១ ទី១-រក្សាការប្រកួតនៅដដែលនាចុងឆ្នាំ២០២១ នេះ និងទី២-អាចពន្យារពេលទៅរៀបចំនៅខែមេសា ឬខែឧសភា ឆ្នាំ២០២២។ ចំពោះសេណារីយ៉ូទាំង ២ នេះ ត្រូវបានបណ្ដាប្រទេសសមាជិកអាស៊ានគាំទ្រ តែភាគច្រើនចង់ឲ្យវៀតណាមរក្សាការប្រកួតនៅដដែលច្រើនជាង ពោលគឺចាប់ពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
