មនុស្សជាង ១.០០០នាក់បានតម្រង់ជួរនៅស្ថានទូតថៃ ក្នុងទីក្រុង Yangon (យ៉ាំងហ្គោន) នៅថ្ងៃសុក្រ (ទី១៦ ខែកុម្ភៈ) ខណៈដែលពួកយុវជនព្យាយាមចាកចេញពីសហភាពមីយ៉ាន់ម៉ា បន្ទាប់ពីរបបយោធាបាននិយាយថា ខ្លួននឹងចេញនូវកាតព្វកិច្ចឲ្យចូលបម្រើកងទ័ព។

យោធាបាននិយាយកាលពីចុងសប្តាហ៍មុនថា ខ្លួននឹងអនុវត្តច្បាប់ដែលអនុញ្ញាតឲ្យខ្លួនកោះហៅបុរសទាំងអស់ដែលមានអាយុចន្លោះពី ១៨ ទៅ ៣៥ឆ្នាំ និងស្ត្រីដែលមានអាយុពី ១៨ ដល់ ២៧ឆ្នាំឲ្យបម្រើទ័ពយ៉ាងហោចណាស់ ២ឆ្នាំ ខណៈដែលខ្លួនពិបាកនឹងវាយកម្ចាត់ក្រុមប្រឆាំងនឹងរដ្ឋប្រហារឆ្នាំ២០២១ របស់ខ្លួន។

របបយោធាប្រឈមនឹងការប្រឆាំងប្រដាប់អាវុធកាន់តែខ្លាំងឡើងៗ ចំពោះការគ្រប់គ្រងរបស់ខ្លួនរយៈពេល ៣ឆ្នាំបន្ទាប់ពីបានដណ្តើមអំណាចពីរដ្ឋាភិបាលស៊ីវិលជាប់ឆ្នោត ហើយថ្មីៗនេះបានទទួលរងនូវការខាតបង់ដ៏គួរឲ្យភ្ញាក់ផ្អើលជាបន្តបន្ទាប់ ដោយសារសម្ព័ន្ធប្រដាប់អាវុធនៃក្រុមជនជាតិភាគតិច។

ស្ថានទូតថៃក្នុងទីក្រុងយ៉ាំងហ្គោន ត្រូវបានកកកុញទៅដោយបុរស និងស្ត្រីវ័យក្មេងដែលកំពុងស្វែងរកទិដ្ឋាការចាកចេញពីសហភាពមីយ៉ាន់ម៉ា ចាប់តាំងពីមានការប្រកាស កាលពីថ្ងៃសៅរ៍សប្តាហ៍មុន ដែលថា «ច្បាប់ចូលបម្រើទ័ពរបស់ប្រជាជន» នឹងត្រូវចូលជាធរមាន។

នៅថ្ងៃសុក្រនេះ អ្នកសារព័ត៌មានរបស់ទីភ្នាក់ងារព័ត៌មាន AFP បានឃើញមនុស្សឈរជាជួរចន្លោះពី ១.០០០នាក់ ទៅ ២.០០០នាក់ដើរតាមដងផ្លូវក្បែរស្ថានទូត ក្នុងទីក្រុងយ៉ាំងហ្គោន ដោយធៀបនឹងចំនួនមិនដល់ ១០០នាក់ នៅមុនការប្រកាស នាថ្ងៃសៅរ៍នោះ។ ស្ថានទូតបាននិយាយថា ខ្លួនកំពុងចេញសំបុត្រចំនួន ៤០០សន្លឹក ក្នុងមួយថ្ងៃ ដើម្បីដោះស្រាយជាមួយការឈរបន្តកន្ទុយគ្នានេះ។

ការពិតទៅ ច្បាប់នេះត្រូវបានបង្កើតឡើងដោយរបបយោធាមុន ក្នុងឆ្នាំ២០១០ ប៉ុន្តែមិនធ្លាប់ត្រូវប្រើនោះទេ ហើយក៏មិនច្បាស់ថា តើច្បាប់នេះនឹងត្រូវអនុវត្តដោយរបៀបណា។ មិនមានព័ត៌មានលម្អិតអំពីថា តើអ្នកដែលត្រូវបានកោះហៅ នឹងត្រូវតែបម្រើកងទ័ពនោះទេ ប៉ុន្តែយុវជនជាច្រើនមិនចង់រង់ចាំ និងស្វែងរកផ្លូវគេចចេញ៕