អាហ្វហ្គានីស្ថាន៖ ក្រុមមន្ត្រីបាននិយាយថា ទាហានអាហ្វហ្គានីស្ថានជាង ១.០០០នាក់បានភៀសខ្លួនទៅកាន់ប្រទេសតាហ្ស៊ីគីស្ថានដែលនៅជិតខាង បន្ទាប់ពីមានការប៉ះទង្គិចជាមួយក្រុមសកម្មប្រយុទ្ធតាលីបង់។
យោងតាមសេចក្ដីថ្លែងការណ៍ចេញដោយ ឆ្មាំការពារព្រំដែនរបស់ប្រទេសតាហ្ស៊ីគីស្ថាន កងទ័ពបានដកថយនៅតាមព្រំដែនដើម្បីជួយសង្គ្រោះជីវិតរបស់ពួកគេ។ អំពើហិង្សាបានកើនឡើងនៅក្នុងប្រទេសអាហ្វហ្គានីស្ថាន ហើយពួកតាលីបង់បានកំពុងវាយដណ្ដើមតំបន់សំខាន់ៗ ជាពិសេសនៅភាគខាងជើងប្រទេសក្នុងប៉ុន្មានសប្តាហ៍ថ្មីៗនេះ។ ការកើនឡើងនៃអំពើហិង្សានេះមានឡើង ខណៈសហរដ្ឋអាមេរិក ចក្រភពអង់គ្លេស និងសម្ព័ន្ធមិត្តនឹងដកកងទ័ពរបស់ខ្លួនចេញ បន្ទាប់ពីបំពេញបេសកកម្មរយៈពេល ២០ឆ្នាំ។
កម្លាំងបរទេសដែលនៅសេសសល់ភាគច្រើននៅក្នុងប្រទេសអាហ្វហ្គានីស្ថាន បានចាកចេញមុនថ្ងៃផុតកំណត់ខែកញ្ញា។ មានការព្រួយបារម្ភថា យោធាអាហ្វហ្គានីស្ថានដែលត្រូវបានគេសន្មតថា កាន់កាប់លើសន្តិសុខនៅក្នុងប្រទេសនឹងដួលរលំ។ ក្រោមកិច្ចព្រមព្រៀងជាមួយក្រុមតាលីបង់ សហរដ្ឋអាមេរិក និងសម្ព័ន្ធមិត្តអង្គការណាតូបានព្រមព្រៀងថា នឹងដកទាហានទាំងអស់ជាថ្នូរនឹងការប្ដេជ្ញាចិត្តពីសំណាក់ក្រុមសកម្មប្រយុទ្ធ ដើម្បីកុំឲ្យក្រុមជ្រុលនិយមផ្សេងទៀតធ្វើសកម្មភាពក្នុងតំបន់នានា ដែលពួកគេបានគ្រប់គ្រង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
