ភ្នំពេញ៖ ស្ថានឯកអគ្គរាជទូតថៃប្រចាំកម្ពុជា សហការជាមួយបណ្ដាញអតីតនិស្សិតកម្ពុជា ដែលបញ្ចប់ការសិក្សាពីប្រទេសថៃ និង Go Study Thailand នៅថ្ងៃទី១៧ ខែកុម្ភៈនេះ បាន​ប្រកាស​បើកកម្មវិធី “ពិព័រណ៍ការសិក្សា និងការងារថៃ២០២៤” នៅ CJCC សាកលវិទ្យាល័យ​ភូមិន្ទ​ភ្នំពេញ។

នៅក្នុងកម្មវិធីនេះ ឯកឧត្តម ឆឺតគៀត អាតថាកន (Cherdkiat Atthakor) ឯកអគ្គរាជទូត​ថៃ​ប្រចាំ​នៅ​កម្ពុជា បានមានប្រសាសន៍ថា កម្មវិធីនេះ នឹងផ្តល់ឱកាស​ដល់​អ្នក​ចូល​រួម​ក្នុង​ការ​ស្វែង​រក​ឱកាស​ពិសេសសម្រាប់ការសិក្សានៅប្រទេសថៃ ជាមួយសាកលវិទ្យាល័យ​នានា​ឈាន​មុខ​គេ​ពី​ប្រទេស​ថៃ ហើយនឹងអាចផ្តល់នូវឱកាសការងារជាមួយក្រុមហ៊ុនថៃល្បីៗជាច្រើននៅកម្ពុជា។

ឯកឧត្តម បានបន្តទៀតថា នៅឆ្នាំនេះមានវិស័យអប់រំឯកជន និងក្រុមហ៊ុនពាណិជ្ជកម្មចំនួនជាង ២០ក្រុមហ៊ុន ដើម្បីចូលរួមតាំងបង្ហាញព័ត៌មានអំពីកម្មវិធីសិក្សា និងឱកាស​ការងារ​ជូន​ដល់​យុវជន​នៅ​កម្ពុជា។ ឯកឧត្តម សង្ឃឹមយ៉ាងមុតមាំថា វេទិកានេះនឹងពង្រឹងទំនាក់ទំនង រវាង​ប្រទេស​ទាំង​ពីរកាន់តែរឹងមាំបន្ថែមទៀត តាមរយៈវិស័យអប់រំ និងឱកាសការងារនេះ។

ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា វេទិកា​ពិព័រណ៍​អប់រំ និងការងារនេះថា បានប្រព្រឹត្តទៅ​នៅ​ពេល​ដែល​ប្រជាជាតិ​កម្ពុជា​កំពុង​រស់​នៅ​ក្នុង​សន្តិភាព ឯកភាពជាតិនិងទឹកដី ស្ថិរភាពនយោបាយ សន្តិសុខ សណ្តាប់ធ្នាប់សង្គម និង​ការអ​ភិវឌ្ឍ​សេដ្ឋកិច្ច ក្រោមការដឹកនាំរបស់រាជរដ្ឋាភិបាលដែលមាន សម្តេចធិបតី ហ៊ុន ម៉ាណែត នាយករដ្ឋ​មន្ត្រី​នៃកម្ពុជា។ កត្តាសន្តិភាព និងស្ថិរភាពនយោបាយនេះ បានជំរុញឱ្យទំនាក់​ទំនង​រវាង​កម្ពុជា និងថៃ កាន់តែប្រសើរឡើង ជាពិសេសរាជរដ្ឋាភិបាលនៃប្រទេសទាំងពីរ បាន​ផ្លាស់​ប្តូរ​ទស្សន​កិច្ចផ្លូវរដ្ឋទៅវិញទៅមកក្នុងការលើកកម្ពស់ទំនាក់ទំនង និងកិច្ចសហប្រតិបត្តិការទ្វេភាគី ក្នុង​នាមជាប្រទេសសមាជិកអាស៊ាន៕ អត្ថបទ៖ ឈិត បូរ៉ាវី