ក្រុមអ្នកគាំទ្រគណបក្សសម្ព័ន្ធប្រជាធិបតេយ្យធំ (GDA) កាលពីថ្ងៃសុក្រ ទី ១៦ ខែកុម្ភៈ បានតវ៉ានៅក្នុងខេត្ត Sindh ភាគខាងត្បូងប្រទេសប៉ាគីស្ថាន ដោយបានបិទផ្លូវធំមួយប្រឆាំងនូវអ្វីដែលពួកគេបានចោទប្រកាន់ថា មានការក្លែងបន្លំក្នុងការបោះឆ្នោតដែលបានបញ្ចប់ទៅ នៅក្នុងប្រទេសនេះ។ មេដឹកនាំ និងអ្នកគាំទ្រ គណបក្ស GDA បានប្រមូលផ្តុំគ្នា ទាមទារលទ្ធផល សេរី និងយុត្តិធម៌។

គណបក្ស សម្ព័ន្ធប្រជាធិបតេយ្យធំ (GDA) គឺជាសម្ព័ន្ធនយោបាយក្នុងតំបន់ដែលមានមូលដ្ឋាននៅខេត្ត Sindh ប្រទេសប៉ាគីស្ថាន។ វាត្រូវបានបង្កើតឡើងនៅថ្ងៃទី ២៣ ខែតុលា ឆ្នាំ ២០១៧ ជាចលនាមួយប្រឆាំងរដ្ឋាភិបាលរបស់គណបក្សប្រជាជនប៉ាគីស្ថាន (PPP) ក្នុងខេត្ត Sindh ដោយចោទប្រកាន់ថា រដ្ឋាភិបាលមានអភិបាលកិច្ចមិនល្អ ប្រកាន់របបហ្វាស៊ីសនិយម និងអំពើពុករលួយ។ ប្រទេសប៉ាគីស្ថាន បានបោះឆ្នោតថ្នាក់ជាតិ និងថ្នាក់ខេត្ត កាលពីថ្ងៃទី ៨ ខែកុម្ភៈ ប៉ុន្តែការបោះឆ្នោតត្រូវបានរំខានដោយការចោទប្រកាន់ពីការបន្លំដើម្បីធ្វើឲ្យបរាជ័យបេក្ខជនឯករាជ្យដែលគាំទ្រដោយអតីតនាយករដ្ឋមន្ត្រី លោក Imran Khan ដែលជាប់ពន្ធនាគារ។

រដ្ឋាភិបាលចាំផ្ទះ និងគណៈកម្មាធិការរៀបចំការបោះឆ្នោតប្រទេសប៉ាគីស្ថាន បានច្រានចោលការចោទប្រកាន់នេះ និងបាននិយាយថា ប្រទេសមានច្បាប់ និងប្រព័ន្ធដើម្បីស៊ើបអង្កេតការតវ៉ាជាក់លាក់។ ទន្ទឹមនឹងនេះដែរ មេដឹកនាំគណបក្ស PTI របស់អតីតនាយករដ្ឋមន្ត្រី Imran Khan បាននិយាយនៅក្នុងសន្និសីទសារព័ត៌មាន ក្នុងទីក្រុង Islamabad ស្តីពីការបន្លំដែលបានចោទប្រកាន់ ដោយបានចាត់ទុកថាជា «ការវាយលុកធ្ងន់ធ្ងរលើលទ្ធិប្រជាធិបតេយ្យ»។

សេតវិមានបាននិយាយថា សហរដ្ឋអាមេរិក មានការព្រួយបារម្ភចំពោះរបាយការណ៍នៃការបំភិតបំភ័យ និងការគាបសង្កត់អ្នកបោះឆ្នោត នៅក្នុងការបោះឆ្នោតរបស់ប្រទេសប៉ាគីស្ថាន បន្ទាប់ពីមានរបាយការណ៍អំពីការតវ៉ានៅក្នុងផ្នែកខ្លះរបស់ប្រទេស។ ការបោះឆ្នោតរបស់ប្រទេសប៉ាគីស្ថាន កាលពីសប្តាហ៍មុន ពុំបានផ្តល់សំឡេងភាគច្រើនច្បាស់លាស់សម្រាប់បេក្ខជនណាម្នាក់ឡើយ ប៉ុន្តែបេក្ខជនឯករាជ្យដែលគាំទ្រដោយអតីតនាយករដ្ឋមន្ត្រីជាប់ពន្ធនាគារ លោក Imran Khan បានទទួលអាសនៈចំនួន ៩២អសនៈ ក្នុងចំណោម ២៦៤ អាសនៈ ដែលធ្វើឱ្យពួកគេក្លាយជាក្រុមធំបំផុតមួយ។