កសិករប្រទេសឥណ្ឌាកាលកាលពីថ្ងៃសុក្រ ទី១៦ ខែកុម្ភៈ បានទាមទារជំនួយហិរញ្ញវត្ថុ សម្រាប់អ្នកដែលរងរបួស ក្នុងអំឡុងការតវ៉ាដែលនៅបន្ត។

កសិកររាប់ពាន់នាក់ បានចាប់ផ្ដើមដង្ហែក្បួនបាតុកម្មដែលគេដាក់ឈ្មោះថា «តោះយើងទៅកាន់ទីក្រុងដេលី» កាលពីដើមសប្តាហ៍នេះ ដើម្បីជំរុញឱ្យរដ្ឋាភិបាលកំណត់តម្លៃអប្បបរមាសម្រាប់ផលិតផលរបស់ពួកគេ ប៉ុន្តែត្រូវបានរារាំងដោយកងកម្លាំងសន្តិសុខ ក្នុងចម្ងាយប្រហែល ២០០ គីឡូម៉ែត្រពីរដ្ឋធានី បង្កឱ្យមានការប៉ះទង្គិចគ្នា រវាងក្រុមបាតុករ និងនគរបាល។ មេដឹកនាំសហជីពកសិករ បាននិយាយថា រដ្ឋាភិបាលគួរតែផ្តល់សន្តិសុខការងារ និងជំនួយហិរញ្ញវត្ថុដល់បាតុករដែលរងរបួស សម្រាប់ការរស់រានមានជីវិតរបស់ពួកគេបន្តទៅមុខទៀត។ សាកសពរបស់កសិករតវ៉ាអាយុ ៦៣ឆ្នាំម្នាក់ ដែលបានស្លាប់ដោយសារគាំងបេះដូង កាលពីព្រឹកថ្ងៃសុក្របានមកដល់ព្រំដែន Shambhu ជាកន្លែងដែលក្រុមអ្នកតវ៉ាបានគោរពវិញ្ញាក្ខន្ធដល់លោក។ កសិករ បានចោទប្រកាន់ថាបាតុករ បាតុករប្រមាណ៤០០នាក់ បានរងរបួសដោយការប៉ះទង្គិចគ្នា បង្កឡើងនៅព្រំដែន រដ្ឋ Punjab-Haryana ក្នុងពេលមានការបាញ់ឧស្ម័នបង្ហៀរទឹកភ្នែកជាបន្តបន្ទាប់ដោយនគរបាលបង្ក្រាបកុបកម្ម។ ការបាញ់ឧស្ម័នបង្ហៀរទឹកភ្នែក ត្រូវបានប្រើជាថ្មីម្តងទៀតនៅពេលយប់ដើម្បីបំបែកក្រុមបាតុករមួយក្រុមតូច ដែលត្រូវបានគេរាយការណ៍ថាព្យាយាមបង្កហេតុដល់ការការពាររបស់នគរបាល។ កសិករ នៅតែបោះជំរំនៅតាមព្រំដែនរវាងរដ្ឋ Punjab និងរដ្ឋ Haryana កាលពីថ្ងៃសុក្រ ប៉ុន្តែបានផ្អាកការហែក្បួនតវ៉ារបស់ពួកគេទៅកាន់ទីក្រុង New Delhi រហូតដល់សហជីពរបស់ពួកគេចាប់ផ្តើមការចរចាម្តងទៀត ជាមួយរដ្ឋមន្ត្រីរដ្ឋាភិបាល នៅថ្ងៃអាទិត្យស្អែកនេះ។

ការតវ៉ា កើតឡើងរយៈពេលពីរឆ្នាំ បន្ទាប់ពីរដ្ឋាភិបាលរបស់ លោក Modi ក្រោយពីចលនាតវ៉ាស្រដៀងគ្នានេះ បានលុបចោលច្បាប់កសិកម្មមួយចំនួន ហើយបានសន្យាថានឹងស្វែងរកវិធីដើម្បីធានាបានតម្លៃគាំទ្រសម្រាប់ផលិតផលទាំងអស់។