កំពត ៖ លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការ​នគរបាលខេត្តកំពត​បាន​ផ្សព្វផ្សាយ​តាម​ហ្វេសប៊ុក​របស់នៅថ្ងៃទី១៧ ខែកុម្ភៈ ឆ្នាំ២០២៤ថា ដោយសារមាន​សំណូមពរ​ក៏ដូចជា​កា​រផ្ត​ល់​មតិ​ជា​ច្រើនពីបងប្អូនប្រជាពលរដ្ឋទាំងអស់ពាក់ព័ន្ធស្លាកសញ្ញាកំណត់ល្បឿនតូចមើលមិនឃើញ លោក​បានធ្វើស្លាកសញ្ញាកំណត់ល្បឿនដែលមានទំហំ 1,50m X 1,50m ចំនួន​បី​ផ្ទាំង​ចាប់​ពី​ព្រំ​ប្រទល់​នរាយណ៍ស្រុកឈូក រហូតដល់ក្លោងទ្វារចូលក្រុងកំពតដែលមានចម្ងាយប្រហែល ៥០​គីឡូម៉ែត្រ ដើម្បីងាយស្រួលបងប្អូនមើលឃើញ។

ជាមួយនឹងការលើកឡើងនេះដែរស្នងការនគរបាលខេត្តកំពតបានចែកចាយភ្ជាប់នូវផ្ទាំងស្លាកនោះ​ផងដែរ និងបានបន្ថែមថា នេះជាគំរូស្លាកសញ្ញាដែលលោករៀបចំ ហើយ​ស្អែក​នេះ​នឹង​រៀបចំ​យក​ទៅ​តំឡើង​នៅតាមគោលដៅដែលបានគ្រោងទុក។

ស្នងការនគរបាលខេត្តកំពតបញ្ជាក់ថា ចំពោះការចុះបាញ់​ល្បឿន​ក៏​លោក​នៅ​បន្ត​ប្រាប់​បងប្អូន​ប្រជាពលរដ្ឋ​មុនមួយថ្ងៃដដែល លោកសង្ឃឹមថា បងប្អូនប្រជាពលរដ្ឋ​នឹង​ចូល​រួម​គោរ​ព​ច្បាប់​ចរាចរណ៍​ទាំង​អស់គ្នា ដោយក្តីគោរពស្រលាញ់ចំពោះបងប្អូនជនរួមជាតិទាំងអស់ និងសូមធ្វើ​ដំណើរ​ទីជិតទីឆ្ងាយប្រកបដោយសុវត្ថិភាពខ្ពស់៕ អត្ថបទ ៖ ប្រាក់ វ៉ាន់ដា