នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាន​និយាយ​កាល​ពីថ្ងៃសុក្រថា អ៊ីស្រាអែល នឹងមិនរងសម្ពាធក្នុងការទទួលយករដ្ឋប៉ាឡេស្ទីនទេ បន្ទាប់​ពី​របាយការណ៍របសសារព័ត៌មាន Washington Postថា សម្ព័ន្ធមិត្ត​ដ៏សំខាន់​របស់​អ៊ីស្រាអែល គឺសហរដ្ឋអាមេរិក កំពុងផ្លាស់ប្តូរផែនការ ដើម្បីបង្កើតរដ្ឋប៉ាឡេស្ទីន។

លោក​ណេតាន់យ៉ាហ៊ូ បាននិយាយ​នៅ​ក្នុង​សេចក្តីថ្លែងការណ៍​មួយ​ដែល​បាន​ចេញ​ផ្សាយ​បន្ទាប់​ពី​ការ​សន្ទនាតាមទូរស័ព្ទជាមួយលោកប្រធានាធិបតីសហរដ្ឋអាមេរិក ចូ បៃដិន ( Joe Biden) ថា «អ៊ីស្រាអែលបដិសេធយ៉ាងដាច់អហង្ការនូវសេចក្តីសម្រេចអន្តរជាតិទាក់ទងនឹងការតាំងទីលំនៅអចិន្ត្រៃយ៍​ជាមួយប៉ាឡេស្ទីន»។ «អ៊ីស្រាអែល នឹងបន្តប្រឆាំង​នឹងការ​ទទួល​ស្គាល់​ជា​ឯកតោភាគី នៃ​រដ្ឋប៉ាឡេស្ទីន​»។

លោកបានថ្លែងថា ភាពជារដ្ឋ នឹងក្លាយជា «រង្វាន់ដ៏ធំ» បន្ទាប់ពីការវាយប្រហារកាលពីថ្ងៃទី៧ ខែ​តុលា ដែលដឹកនាំដោយក្រុមហាម៉ាសលើប្រទេសអ៊ីស្រាអែល ដែល​បាន​បង្ក​ឲ្យ​មាន​សង្រ្គាម​ចុង​ក្រោយ​បង្អស់​នៅក្នុងតំបន់ហ្កាហ្សា។ លោក បានបន្ថែមថា ការរៀបចំបែបនេះ អាចឈានដល់​ការ​ចរចា​ដោយ​ផ្ទាល់រវាងភាគីទាំងពីរប៉ុណ្ណោះ ទោះបីជាមិនមានការចរចាណាមួយត្រូវបានធ្វើឡើង ចាប់តាំងពីឆ្នាំ ២០១៤ក៏ដោយ។

សារព័ត៌មាន Washington Post បានរាយការណ៍កាលពីថ្ងៃព្រហស្បតិ៍ថា សហរដ្ឋអាមេរិក កំពុង​ធ្វើការជាមួយប្រទេសអារ៉ាប់មួយចំនួន រួមទាំងអេហ្ស៊ីប ហ្ស៊កដានី អារ៉ាប់រួម កាតា និង​អារ៉ាប៊ីសាអ៊ូឌីត ដែលអ៊ីស្រាអែល បានស្វែងរកជាយូរមកហើយ ដើម្បីប​ង្កើត​ទំនាក់​ទំនង​ការ​ទូត​លើ​ផែន​ការ​ក្រោយ​សង្គ្រាម​ សម្រាប់​តំបន់​ដែល​នឹ​ង​រួម​បញ្ចូល​ការ​កំណត់​ពេល​វេលា​ដ៏​ច្បាស់​លាស់​សម្រាប់​ការ​បង្កើតរដ្ឋប៉ាឡេស្ទីន៕