អាមេរិក ៖ អនុប្រធានាធិបតីសហរដ្ឋអាមេរិកលោកស្រី Kamala Harris និយាយថា រដ្ឋបាលលោកប្រធានាធិបតីសហរដ្ឋអាមេរិក Joe Biden ត្រៀមខ្លួនរួចរាល់ដើម្បីគាំទ្រអ៊ុយក្រែន ក្នុងសង្រ្គាមជាមួយរុស្ស៊ី ដរាបណាសង្រ្គាមនៅតែបន្ត ហើយទីក្រុងវ៉ាស៊ីងតោន នឹងជំរុញឲ្យរុស្ស៊ីសងការខូចខាតទាំងអស់ដល់អ៊ុយក្រែន បន្ទាប់ពីសង្រ្គាមបញ្ចប់ ។ 

 នៅក្នុងសន្និសីទសារព័ត៌មានរួមគ្នាជាមួយប្រធានាធិបតីអ៊ុយក្រែនលោក Volodymyr Zelenskiy នៅកិច្ចប្រជុំសន្តិសុខក្រុង Munich ប្រចាំឆ្នាំកាលពីថ្ងៃសៅរ៍ លោកស្រី Harris និយាយថា ពួកយើងនឹងបន្តកិច្ចខិតខំរបស់ពួកយើង ដើម្បីធានាដល់យុត្តិធម៌ និងសន្តិភាពយូរអង្វែង ។  

 សេចក្តីអត្ថាធិប្បាយរបស់លោកស្រី បានកើតមាន ស្របពេលដែលគោលនយោបាយពិភពលោករបស់សហរដ្ឋអាមេរិក ព្យាយាមរកវិធីសាស្រ្តទប់ទល់ជាមួយរុស្ស៊ី ជាពិសេសក្រោយពេលទីក្រុងវ៉ាស៊ីងតោន អនុម័តជំនួយការពារជាតិ ១១០ពាន់លានដុល្លារសម្រាប់អ៊ុយក្រែន ហើយការស្វែងរកជំនួយ ៦០ពាន់លានដុល្លារបន្ថែមទៀត សម្រាប់ទីក្រុងគីវ  

របស់រដ្ឋបាលលោក Biden បានជាប់គាំងនៅសភាសហរដ្ឋអាមេរិក ។ 

 លោកស្រី Harris បន្តថា លោកប្រធានាធិបតី Biden និងខ្ញុំ នឹងបន្តធ្វើការដើម្បីធានាដល់ធនធាន និងអាវុធដែលអ្នកត្រូវការ ដើម្បីសម្រេចជោគជ័យ ។ ពួកយើងនឹងនៅជាមួយអ្នក ដរាបណាសង្រ្គាមនៅតែអូសបន្លាយ ៕