បាត់ដំបង ៖ នៅព្រឹកថ្ងៃទី១៨ ខែកុម្ភះ ឆ្នាំ២០២៤នេះ លោកជំទាវបណ្ឌិត ពេជ ចន្ទមុន្នី អគ្គស្នងការសមាគមកាយឫទ្ធិនារីកម្ពុជា បានអញ្ជើញជាវាគ្មិនកិត្តិយសក្នុងកម្មវិធី “បងស្រី និងប្អូនស្រី” ដោយបានចែករំលែកចំណេះដឹង បទពិសោធល្អៗ អំពីការសិក្សាតាំងពីថ្នាក់បឋម ដល់ថ្នាក់បណ្ឌិត ជូនដល់សមាជិកា ប្អូនៗយុវតី និងសិស្សនិស្សិតប្រមាណ៦៥០នាក់ នៅសាលប្រជុំបាត់ដំបងសុីធីហល។ ដោយអញ្ជើញចូលរួមពីសំណាក់លោកជំទាវជាភ្ញៀវកិត្តិយស ស្នងការ សមាជិកា សមាជិកគាំទ្រ យុវតី ក្រុមវឌ្ឍននារី ប្អូនៗសិស្សនិស្សិតមកពីតាមសាលានានា និងមន្ត្រីរាជការ នៃរដ្ឋបាលខេត្តបាត់ដំបងប្រមាណ៦៥០នាក់។ 

ក្នុងឱកាសឆ្លើយតបសំនួរ លោកជំទាវបណ្ឌិត ពេជ ចន្ទមុន្នី បានចែករំលែកចំណេះដឹង បទពិសោធជីវិត និងការងារជូនដល់សមាជិកា និងអ្នកចូលរួម ពិសេសប្អូនៗសិស្សនិស្សិតមកពីតាមបណ្តាសាលានានា ចូលរួមទទួលយកបទពិសោធដែលលោកជំទាវបានជួបប្រទះកន្លងមក ដើម្បីធ្វើជាត្រីវិស័យចង្អុលទិស ក្នុងការរៀបចំគោលដៅរបស់ខ្លួននាពេលអនាគត។ បន្ថែមលើនេះ ការចូលរួមក្នុងកម្មវិធី ក៏ជាផ្នែកមួយនៃការបង្កើនបណ្ដាញទំនាក់ទំនងល្អ (Good Network) ដល់ខ្លួនឯង ជាមួយមិត្តភក្តិដទៃទៀត និងជាឱកាសឱ្យខ្លួនយើងបញ្ចេញភាពក្លាហាន តាមរយ:ការសួរសំណួរ ហើយប្អូនៗទទួលបានត្រឡប់ទៅវិញនូវសារសំខាន់ៗមួយចំនួន ដែលលោកជំទាវបណ្ឌិតយកបទពិសោធជីវិតមកចែករំលែកផ្ទាល់។ 

បទពិសោធ និងចំណេះដឹងខាងលើ បានបង្ហាញពីថាមពល និងការចាប់ផ្តើមដ៏ល្អ សម្រាប់ប្អូនៗយុវតី និងសមាជិកាទាំងអស់ ដោយត្រូវបណ្តុះគំនិតវិជ្ជមាន មានពុទ្ធិ និងភាពម្ចាស់ការលើខ្លួនឯង ដើម្បីយកទៅអនុវត្តលើជីវភាពប្រចាំថ្ងៃ ដែលមានទាំងការសិក្សា និងការអនុវត្តការងារជាដើម។

សូមបញ្ជាក់ថាអង្គពិធីទាំងមូលបានសម្តែងក្ដីរីករាយ ចំពោះសារសំខាន់ៗរបស់លោកជំទាវបណ្ឌិត ពេជ ចន្ទមុន្នី ដែលបានចែករំលែកបទពិសោធជីវិត និងការងារ ជូនដល់ប្អូនៗសិស្សនិស្សិត យុវតី និងក្រុមវឌ្ឍននារីនាពេលនេះ ដើម្បីបានជាគន្លឹះ អាចឱ្យពួកប្អូនៗយកទៅអនុវត្ត កសាងអនាគត និងទិសដៅជីវិតឱ្យប្រសើរឡើង។ ជាងនេះផងដែរ គឺនឹងកាន់តែជំរុញទឹកចិត្ត ការចូលរួមស្ម័គ្រចិត្តចែករំលែក របស់សមាជិកគាំទ្រកាន់តែខ្លាំងបន្ថែមទៀត លើសកម្មភាពការងារសង្គម ព្រោះទឡ្ហីករណ៍ខាងលើ បានបង្ហាញយ៉ាងច្បាស់ពីសកម្មភាពពិតជាក់ស្តែង និងទទួលបានផលប្រយោជន៍ ពីកម្មវិធីរបស់សមាគម ហើយអភិវឌ្ឍពួកគាត់យ៉ាងពិតប្រាកដ៕ អត្ថបទ ៖ សំ ងីម