កំពត៖ ឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត នៅថ្ងៃទី១៨ ខែកុម្ភៈ ឆ្នាំ២០២៤ បានរៀបចំដំឡើងស្លាកសញ្ញាកំណត់ល្បឿននៅ​តាមគោលដៅចំនួន៣ តាម​បណ្ដោយ​ផ្លូវ​ជា​តិលេខ៣។

យោងតាមហ្វេសប៊ុកបរស់ស្នងការនគរបាលខេត្តកំពត បានបញ្ជាក់ថា ទីតាំងចំនួន៣ លើ​ផ្លូវ​ជាតិ​លេខ​៣ ពីភ្នំពេញទៅខេត្តកំពត បានរៀបចំ​ដំឡើងស្លាកសញ្ញាបាញ់ល្បឿន​រួចរាល់​ហើយ​ គឺ៖

គោលដៅទី១. ចន្លោះបង្គោលគីឡូម៉ែត្រលេខ 98-99 ស្ថិតក្នុងភូមិពស់ពង ឃុំនរាយណ៍ ស្រុកឈូក ខេត្តកំពត ។

គោលដៅទី២. ចន្លោះបង្គោលគីឡូម៉ែ្រតលេខ 116-117 ស្ថិតក្នុងភូមិត្រពាំងរាំង ឃុំអង្គរមាស ស្រុកដងទង់ ខេត្តកំពត ។

គោលដៅទី៣. ចន្លោះបង្គោលគីឡូម៉ែត្រលេខ 132-133 ស្ថិតក្នុង ភូមិព្រៃថ្នង ឃុំព្រៃថ្នង ស្រុកទឹកឈូ ខេត្តកំពត ។

ឧត្តមសេនីយ៍ទោ ម៉ៅ ច័ន្ទមធុរិទ្ធបានបញ្ជាក់ដែរថា នៅពេលចុះអនុវត្ត គឺ​មិន​អនុវត្ត​ទាំងបី​គោលដៅ​ព្រម​គ្នានោះទេ គឺនគរបាលនឹងបែងចែកវេនគ្នា ដើម្បីចុះអនុវត្ត ហើយ បើពលរដ្ឋ​ឃើញ​មាន​មន្រ្ដី​នគរបាលរូបណាបាញ់ល្បឿនខុសគោលដៅដែលបានកំណត់នេះ សូមថតឱ្យបាន ដើម្បី​អនុវត្ត​វិន័យ​កងកម្លាំងនគរបាលជាតិ។

 សូមជម្រាបថា ក្រោយមានសារសំណូមពរ ក៏​ដូច​ជាការផ្តល់មតិជា​ច្រើន​ពី​បងប្អូន​ប្រជាពលរដ្ឋ​ទាំង​អស់​ពាក់ព័ន្ធស្លាកសញ្ញាកំណត់ល្បឿនតូចមើលមិនឃើញ ស្នងការនគរបាលខេត្តកំពត បាន​ធ្វើ​ស្លាក​សញ្ញាកំ​ណត់ល្បឿនដែលមានទំហំ ១,៥០ ម៉ែត្រ គុណ ១,៥០ ម៉ែត្រចំនួន ៣ ផ្ទាំង ដើម្បី​ដំឡើង​តាមគោលដៅចាប់ពីព្រំប្រទល់នរាយណ៍​ស្រុកឈូក រហូត​ដល់​ក្លោង​ទ្វារ​ចូល​ក្រុង​កំពត​ដែល​មានចម្ងាយប្រហែល ៥០ គីឡូម៉ែត្រ ដើម្បីងាយស្រួលដល់ប្រជាពលរដ្ឋមើលឃើញ។

ស្នងការខេត្តបញ្ជាក់ថា ចំពោះការចុះបាញ់ល្បឿន ក៏ស្នង​ការនគរបាល​ខេត្ត​នៅប​ន្ត​ប្រាប់​ពលរដ្ឋ​មុន​មួយ​ថ្ងៃដ​ដែល ដូច្នេះស្នងការនគរបាលខេត្តសង្ឃឹមថា ពលរដ្ឋនឹង​ចូល​រួម​គោរព​ច្បាប់​ចរាចរណ៍​ទាំង​អស់គ្នា​៕