សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសចាត់វិធានការ​ដោយមិនត្រូវ​លើកលែង ជាដាច់ខាតចំពោះជនជាតិចិនតៃវ៉ាន់ពីរនាក់ ដែលបានផលិតវីដេអូ​ក្លែងក្លាយ​ដោយ​និយាយរឿងមិនមែនជាការពិត នៅខេត្តព្រះសីហនុ កាលពីកន្លងទៅថ្មីៗនេះ បើទោះ មានគេទូរស័ព្ទសុំអន្តរាគមន៍ ដល់សម្តេចក៏ដោយនោះ។

ក្នុងឱកាសបើកការដ្ឋានសាងសង់ស្ពានចាក់អង្រែក្រោម-ព្រែកប្រា នាព្រឹកថ្ងៃទី១៩ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានបញ្ជាក់ថា ​មានអ្នកទូរស័ព្ទទៅ​សម្តេច​ដើម្បីសុំអន្តរាគមន៍ឲ្យដោះលែង​ដល់ជនជាតិចិនតៃវ៉ាន់ពីរនាក់ ​ដែល​បាន​ផលិតវីដេ​អូ​និយាយរឿង​អាក្រក់នៅខេត្តព្រះសីហនុ ​ប៉ុន្តែត្រូវបានសម្តេច​បដិសេធ ដោយសម្តេចចាត់ទុកថា បុគ្គលទាំងពីររូបនេះ មានភាព​អាត្មានិយម​ គិតតែ​ផលប្រយោជន៍ខ្លួន ដោយបាន​បំផ្លាញ​កិត្តិយស​ខ្លាំង​ណាស់​ដល់ប្រទេសកម្ពុជា ​តាមរយៈផលិតវីដេអូប្រឌិតរឿងអាក្រក់ ដែលមិនមែនជាការពិតនោះ។

ជាមួយគ្នានោះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រកាសព្រមានដល់បុគ្គល ណា ដែលយកកម្ពុជាជាទីតាំងដើម្បីប្រព្រឹត្តសកម្មភាពអាក្រក់ ហើយធ្វើឲ្យប៉ះពាល់ដល់កិត្តិយស​របស់​ប្រ ទេសកម្ពុជានោះ នឹងត្រូវអនុវត្តច្បាប់ឲ្យបាន​ម៉ឺងម៉ាត់​បំផុត ​ដោយគ្មានការលើកលែងនោះឡើយ ជាពិសេស ​ដូចករណីជនជាតិចិនតៃវ៉ាន់ទាំងពីរនាក់ ដែលត្រូវបានអាជ្ញាធរកម្ពុជា​ចាប់ខ្លួនបន្ទាប់​ពីពួកគេប្រឌិតរឿង មិនពិតនៅខេត្តព្រះសីហនុយ៉ាងដូច្នេះដែរ។

សូមបញ្ជាក់ថា តុលាការខេត្តព្រះសីហនុ បានសម្រេចផ្តន្ទាទោសជនជាតិចិនតៃវ៉ាន់ចំនួនពីរនាក់ ដាក់​ពន្ធនាគារចំនួនពីរឆ្នាំ​ និងពិន័យជាប្រាក់ក្នុងម្នាក់ៗ​ចំនួន៤លានរៀល ពីបទល្មើស​ញុះញង់​បង្កឱ្យមានភាពវឹកវរធ្ងន់ធ្ងរ​ដល់សន្តិសុខសង្គមនៅខេត្តព្រះសីហនុ ​កាលពីថ្ងៃទី១៣ ខែកុម្ភៈកន្លងទៅថ្មីៗនេះ។

ជនជាតិចិនតៃវ៉ាន់ទំាងពីរនាក់នេះ ១.ឈ្មោះ CHEN NENG CHUAN ភេទប្រុស ជនជាតិចិន(តៃវ៉ាន់) និងទី២.មានឈ្មោះ LU TSU HSIEN ភេទប្រុស ជនជាតិចិន(តៃវ៉ាន់)។ ពួកគេទាំងពីរនាក់នេះ

ត្រូវបានស្នងការដ្ឋាននគរបាលខេត្តព្រះសីហនុ ធ្វើការឃាត់ខ្លួនបន្ទាប់ពីពួកគេទាំងពីរនាក់​នេះ​បានផលិតវីដេអូប្រឌិតរឿងមិនពិត ដែលធ្វើឲ្យប៉ះពាល់ដល់កិត្តិយស សណ្ដាប់ធ្នាប់ និងសន្តិសុខ នៅខេត្តព្រះសីហនុ ដើម្បីទាក់ទាញការចាប់អារម្មណ៍នៅលើបណ្ដាញសង្គមនានា ដូចជាធ្វីតធើ ហ្វេសបុក និងTikTokជាដដើម៕អត្ថបទ បាន ចក់