វិទ្យាស្ថានពាណិជ្ជសាស្រ្ត អេស៊ីលីដា បច្ចុប្បន្ននេះបានប្រែក្លាយទៅជាសាកលវិទ្យាល័យ ពាណិជ្ជសាស្រ្ត អេស៊ីលីដា ជាផ្លូវការដែលទទួលស្គាល់ដោយប្រមុខរាជរដ្ឋាភិបាលកម្ពុជា កាល​ពី​ពេល​ថ្មី​ៗ​នេះបាន ប្ដេជ្ញាកសាង​ធនធាន​មនុស្ស​របស់​កម្ពុជា​ឲ្យ​ក្លាយ​ជា​ចលករ​ឆ្នើម​ជំរុញ​កំណើន​សេដ្ឋកិច្ច​ជាតិ។

នៅក្នុងបើកបវេសនកាលឆ្នាំសិក្សាថ្មី និងការទទួលស្គាល់ការប្រែក្លាយពីវិទ្យាស្ថានពាណិជ្ជសាស្រ្ត អេស៊ីលីដា ទៅជាសាកលវិទ្យាល័យ ពាណិជ្ជសាស្រ្ត អេស៊ីលីដា នៅព្រឹកថ្ងៃទី១៩ ខែកុម្ភៈ ឆ្នាំ​២០២៤ លោកបណ្ឌិត ផុន ណារិន សាកលវិទ្យាធិកា មានប្រសាសន៍ថា ក្នុងទិសដៅ​ការងារ​ទៅ​ថ្ងៃ​អនាគត និងដើម្បីឆ្លើយតបទៅនឹងការគាំទ្ររបស់រាជរដ្ឋាភិបាល ជាពិសេស​សម្តេច​អគ្គ​មហា​សេនា​បតី​តេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក្នុង​ការ​ធ្វើ​ឲ្យ​សាកល​វិទ្យាល័យនេះ ក្លាយជាសាកលវិទ្យាល័យ​មាន​ការ​ទុក​ចិត្ត​របស់​សម្តេច​ទាំងទ្វេរ​ដែល​បាន​ចុះហត្ថ​លេខ​ និង​គាំទ្រពេញទំហឹងនេះ សាកលវិទ្យាល័យ ពាណិជ្ជសាស្រ្ត អេស៊ីលីដា នឹង​អភិវឌ្ឍ​កម្ម​វិធី​សិក្សាឲ្យទាន់សម័យជានិច្ច ជាពិសេសកម្មវិធីសិក្សាបែបឌីជីថលឆ្លើយតាមបែបបច្ចេកវិទ្យា និង​វិទ្យាសាស្រ្ត ដើម្បីគាំទ្រគោលនយោបាយ សង្គម សេដ្ឋកិច្ចឌីជីថល។

លោកបានបន្តទៀតថា សាកលវិទ្យាល័យ នឹងខិតខំ​យ៉ាង​ណា​ដើម្បី​ចូលរួម​ចំណែក​ក្នុង​ការ​អភិវឌ្ឍ​ធន​ធាន​មនុស្សឌីជីថល ដើម្បីឲ្យធនធានមនុស្សកម្ពុជាដែលទៅធ្វើការនៅក្រៅបរទេស ក្នុង​ឋានៈ​ជា​អ្នក​ជំនាញការ ពោលទាំងនៅក្នុងស្រុក និងក្រៅស្រុក​មិនមែន​ត្រឹម​ធ្វើ​ការ​ក្នុង​ងារ​ជា​កម្មករ​នោះ​ទេ​។

សូមបញ្ជាក់ថា សាកលវិទ្យាល័យពាណិជ្ជសាស្រ្ត អេស៊ីលីដា ជាក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី និងជាថ្នាលអប់រំធុរកិច្ចប្រកបដោយគុណភាព ដើម្បី​រួម​ចំណែក​ក្នុង​ការ​អភិវឌ្ឍ​សេដ្ឋកិច្ចកម្ពុជា និងថ្នាក់តំបន់។ គិតមកដល់បច្ចុប្បន្ននេះ សាកលវិទ្យាល័យ​ពាណិជ្ជ​សាស្រ្ត ​អេស៊ីលីដា បានដំណើរការរយៈពេល ៨ឆ្នាំ ដោយទទួល​ការ​ចុះ​ឈ្មោះនិ​ស្សិត​សរុប​ចំនួន​ជិត ៨ពាន់នាក់៕ អត្ថបទ៖ ឈិត បូរ៉ាវី