កាលពីថ្ងៃទី១៧ ខែកុម្ភៈ ឆ្នាំ២០២៤ អណ្តូងទឹកស្អាតបានបន្តគល់ជូន ប្រជាពលរដ្ឋអាស្រ័យផលនៅក្នុងឃុំចំនួន៣នៃស្រុកកោះញ៉ែក ខេត្តមណ្ឌលគីរីបន្ថែមទៀត គឺឃុំស្រែហ៊ុយ ឃុំណងខិលិក និងឃុំរយ៉ ដើម្បីប្រើប្រាស់ក្នុងជីវភាពប្រចាំថ្ងៃ។ អណ្តូងទឹកទាំង៨ខាងលើនេះ ប្រគល់ជូនដោយលោកជំទាវ ឌី សុខីទីឃាយុកោ ភរិយាឯកឧត្តម ហ៊ុន ម៉ានិត ប្រធានមូលនិធិអណ្តូងទឹកស្អាតអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក រួមនិងក្រុមការងារ។

មានប្រសាសន៍សំណេះសំណាលជាមួយប្រជាពលរដ្ឋ ដែលបានអាស្រ័យផលអណ្តូងទឹកនាឱកាសនោះ លោកជំទាវប្រធានមូលនិធិ បាននាំនូវការផ្ដាំផ្ញើសួរសុខទុក្ខ ពីសំណាក់សម្ដេចតេជោ ហ៊ុន សែន អតីតនាយករដ្ឋមន្រ្តី និងសម្ដេចកិត្តព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ជូនចំពោះបងប្អូនប្រជាពលរដ្ឋដែលបានចូលរួមថា សម្តេចលោកតែងតែគិតគូរពីទុក្ខលំបាករបស់ប្រជាពលដ្ឋនៅគ្រប់ទីកន្លែង។ ពិសេសការផ្តល់អណ្តូងទឹកស្អាតនាពេលនេះ គឺជាការរួមចំណែកលើកកម្ពស់សុខមាលភាព និងជីវភាពរស់របស់ប្រជាពលរដ្ឋ នៅតាមទីជនបទ អោយមានទឹកស្អាតប្រើប្រាស់គ្រប់គ្រាន់និងមានសុខភាពល្អ។

លោកជំទាវប្រធានមូលនិធិបានឱ្យដឹងទៀតថា អណ្តូងទឹកទាំងនេះគឺ ជាអំណោយរបស់អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក ឪពុកម្តាយបង្កើតសម្តេចតេជោ ហ៊ុន សែន និងអ្នកឧកញ៉ាព្រឹទ្ឋមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី និងឧបាសក លីន គ្រី ឪពុកម្តាយបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ហើយថវិកាដែលយកមកធ្វើអណ្តូងទាំងនេះ គឺបានមកពីបច្ច័យបុណ្យសពបន្ទាប់ពីលោក ទទួលអនិច្ចកម្មទៅ រួមទាំងទ្រព្យសម្បត្តិដែលនៅសល់ គឺយកមកធ្វើជាអណ្តូងទឹកជូនប្រជាពលរដ្ឋ ដែលខ្វះខាតទឹកស្អាតប្រើប្រាស់ នៅគ្រប់រាជធានីខេត្តទាំងអស់រហូតមកដល់ពេលនេះ បានជាង១៥០០អណ្តូងហើយ។ 

លោកជំទាវឱ្យដឹងថា មូលនិធិអណ្តូងទឹកស្អាត បានបង្កើតឡើងជាង១០ឆ្នាំមកហើយ ក្រោមការដឹកនាំដោយលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត តែបច្ចុប្បន្នលោកជំទាវបណ្ឌិត មានភារកិច្ចច្រើនដែលត្រូវបំពេញ ទើបផ្ទេរការងារនេះមកលោកជំទាវ ជាអ្នកដឹកនាំបន្តជូនប្រជាពលរដ្ឋ។ ដូច្នេះសូមឱ្យលោកយាយ លោកតា បងប្អូន ដែលអាស្រ័យផលនៃអណ្តូងទឹកទាំងអស់ រួមគ្នាថែរក្សាអណ្តូងទឹកទាំងនេះ អោយបានល្អ ជាប់គង់វង្សយូអង្វែង ដើម្បីជាប្រយោជន៍រួមនៅក្នុងសហគម។

ប្រជាពលរដ្ឋរស់នៅក្នុងឃុំខាងលើ ភាគច្រើនជាជនជាតិភាគតិច សូមថ្លែងអំណរគុណយ៉ាងជ្រាលជ្រៅ ចំពោះម្ចាស់អំណោយ ជាពិសេសសម្តេចតេជោ ហ៊ុន សែន អតីតនាយករដ្ឋមន្រ្តី សម្តេចកិត្តិព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ដែលលោកតែងតែគិតគូរ ពីជីវភាពរស់នៅរបស់ប្រជាពលរដ្ឋគ្រប់ទិសទី ដែលត្រូវការចាំបាច់នូវទឹកស្អាតប្រើប្រាស់ ព្រោះពេលរដូវប្រាំងចូលមកដល់ ពួកគាត់មានការខ្វះខាតយ៉ាងខ្លាំង ត្រូវទៅរកទឹកនៅកន្លែងឆ្ងាយៗយកមកប្រើប្រាស់។

សូមបញ្ជាក់ថានៅតាមគោលដៅអណ្តូងទឹកនីមួយៗ លោកជំទាវប្រធានមូលនិធិ និងក្រុមការងារ បាននាំយកអំណោយទ្រនប់ដៃរបស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនដល់លោកយាយ លោកតាមួយចំនួន រួមមានទាំងថ្នាំពេទ្យ ក្រណាត់ស ក្រមានិងថវិកាមួយចំនួន។ ដោយឡែក កុមារា កុមារី តូចៗ ដែលបានចូលរួមក្នុងពិធីទទួលបានកាបូបស្ពាយទៅសាលាម្នាក់មួយៗផងដែរ៕ អត្ថបទ៖ សំ ងីម