វ៉ូវីណាម៖ ក្រសួងអប់រំ យុវជន និងកីឡាបានប្រកាសទទួលស្គាល់គណៈកម្មាធិការប្រតិបត្តិថ្មី នៃសហព័ន្ធកីឡាវ៉ូវីណាមកម្ពុជាអាណត្តិទី៤ ជាផ្លូវការហើយ បន្ទាប់ពីសហព័ន្ធបានរៀបចំមហាសន្និបាតបញ្ចប់អាណត្តិទី៣ បន្ដអាណត្តិទី៤ ឆ្នាំ២០២១-២០២៥ ដោយការបោះឆ្នោត និងរៀបចំនូវសមាសភាពថ្នាក់ដឹកនាំចំនួន ១៩រូប ក្រោមការដឹកនាំរបស់ប្រធានសហព័ន្ធថ្មីគឺឯកឧត្ដម អ៊ូ រតនា កាលពីថ្មីៗកន្លងទៅ។
រយៈពេល ៣សប្ដាហ៍បន្ទាប់ពីការរៀបចំមហាសន្និបាតបញ្ចប់អាណត្តិចាស់បន្ដអាណត្តិថ្មី សមាជិកគណៈកម្មាធិការប្រតិបត្តិនៃសហព័ន្ធកីឡាវ៉ូវីណាមកម្ពុជា ត្រូវបានស្ថាប័នកីឡាថ្នាក់ជាតិធំៗទាំងពីរបានទទួលស្គាល់ បន្ទាប់ពីគណៈកម្មាធិការជាតិអូឡាំពិកកម្ពុជា ដែលបានប្រកាសទទួលស្គាល់ជាសមាជិកពេញសិទ្ធ ក្នុងក្របខណ្ឌកីឡាមិនអូឡាំពិកកាលពីចុងខែមិថុនាកន្លងទៅ ដើម្បីបន្ដនិរន្តរភាពដឹកនាំ និងអភិវឌ្ឍវិស័យកីឡានេះឲ្យកាន់តែរីកចម្រើន។ ចំពោះសមាជិកគណៈកម្មការប្រតិបត្តិសហព័ន្ធកីឡាវ៉ូវីណាមកម្ពុជា ដែលទើបត្រូវបានក្រសួងអប់រំ យុវជន និងកីឡាបានប្រកាសទទួលស្គាល់ និងអនុញ្ញាតឲ្យបំពេញភារកិច្ចក្នុងអាណត្តិទី៤ គឺមានសមាសភាពថ្នាក់ដឹកនាំ ១៩រូបដោយមានឯកឧត្តម អ៊ូ រតនា ជាប្រធានសហព័ន្ធ រួមទាំងអនុប្រធាន ៧រូប ឯកឧត្ដម យ៉ាំ ថៃសាន ជាអគ្គលេខាធិការ និងអគ្គលេខាធិការរង ៣រូប, លោកស្រី ញឹម ម៉ី ជាអគ្គហិរញ្ញិក និងអគ្គហិរញ្ញិករង ១រូប រួមទាំងសមាជិកចំនួន ៥រូបផ្សេងទៀត។
ឯកឧត្តម អ៊ូ រតនា ក្រោយទទួលបានការគាំទ្រធ្វើជាប្រធានសហព័ន្ធអាណត្តិថ្មី បានធ្វើការប្ដេជ្ញាចិត្តខ្ពស់ក្នុងការបន្ដដឹកនាំ និងជំរុញការអភិវឌ្ឍវិស័យកីឡាដ៏មានសក្ដានុពលមួយនេះ ពិសេសជម្នះរាល់ឧបសគ្គអំឡុងវិបត្តិកូវីដ-១៩ ដើម្បីរក្សាសក្ដានុពលរបស់កីឡាវ៉ូវីណាម ក្នុងការប្រកួតប្រជែងមេដាយលើឆាកអន្តរជាតិ ដូចជាការត្រៀមការប្រកួតកីឡាស៊ីហ្គេម នៅប្រទេសវៀតណាមនាចុងឆ្នាំ២០២១ នេះ ពិសេសត្រៀមការប្រកួតកីឡាស៊ីហ្គេមឆ្នាំ២០២៣ នៅប្រទេសកម្ពុជាផ្ទាល់តែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
