អន្តរគណៈកម្មការរដ្ឋសភា និងក្រសួងកសិកម្ម នៅព្រឹកថ្ងៃទី១៩ ខែកុម្ភ: ឆ្នាំ២០២៤ ជួប​ប្រជុំ​ពិភាក្សា​ទាក់ទង​នឹង​ការ​អនុម័ត​យល់​ព្រម​លើ​ពិធី​សារ​សម្រាប់​ធ្វើ​វិសោធនកម្ម​កិច្ច​ព្រម​ព្រៀង​ម៉ារ៉ាកេស ស្តីពីការបង្កើតអង្គការពាណិជ្ជកម្មពិភពលោក ដើម្បីបញ្ចូល​កិច្ច​ព្រម​ព្រៀង​ស្តីពី​ការ​ឧបត្ថម្ភ ធនជលផល នៅវិមានរដ្ឋសភា។

កិច្ចប្រជុំនេះធ្វើឡើងរវាងគណៈកម្មការកិច្ចការបរទេស សហប្រតិបត្តិការអន្តរជាតិ និង​ព័ត៌មាន​នៃ​រដ្ឋសភា ដឹកនាំដោយ ឯកឧត្តម សួស យ៉ារ៉ា ប្រធានគណៈកម្មការ សហការ​ជាមួយ​ឯកឧត្តម​បណ្ឌិត ម៉ា ឈឿន ប្រធានស្តីទីគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍​ជនបទ បរិស្ថាន ធនធានទឹក និងឧតុនិយម នៃរដ្ឋសភា និងឯកឧត្តម ប៉ាន សូរស័ក្កិ លេខាធិការគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរ​គមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំ​ដែន​ដី នគរូបនីយកម្ម និងសំណង់ នៃរដ្ឋសភា បានជួបប្រជុំជាមួយឯកឧត្តម ឌិត ទីណា រដ្ឋមន្ត្រី​ក្រសួង​កសិកម្ម ព្រមទាំងសហការី។ 

ឯកឧត្តមរដ្ឋមន្ត្រី ឌិត ទីណា មានប្រសាសន៍ជម្រាបជូនគណៈកម្មការជំនាញនៃរដ្ឋសភាថា សេចក្តី​ព្រាងច្បាប់នេះ មាន ៣មាត្រា នឹងត្រូវ​សិក្សា​បញ្ចូល​កិច្ច​ព្រម​ព្រៀង​ស្តីពី​ការ​ឧបត្ថម្ភ​ធនជល​ផល ដែលគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គគណៈរដ្ឋមន្ត្រីនាថ្ងៃទី២ ខែកុម្ភ: ឆ្នាំ២០២៤ ដើម្បីបញ្ជូនមកសុំការពិនិត្យនិងអនុម័តពីស្ថាប័ននីតិប្បញ្ញត្តិ។

ឯកឧត្តម ថ្លែងថា កិច្ចព្រមព្រៀង​ស្តីពី​ការ​ឧបត្ថម្ភ​ធន​ជលផល​មាន​គោល​បំណង​ដើម្បី​រួម​ចំណែក​ធានា​នូវ​និរន្តរភាពធនធាន ជលផលសមុទ្រ ក្នុងកម្រិតសកល តំបន់ និងរដ្ឋសមាជិកនីមួយៗ នៃអង្គការពាណិជ្ជកម្មពិភពលោក (World Trade Organization) តាមរយៈ​ការ​ហាម​ឃាត់​ ឬ​បញ្ឈប់​នូវ​ការឧបត្ថម្ភធនមានលក្ខណៈបង្កគ្រោះថ្នាក់ពាក់ព័ន្ធការនេសាទសមុទ្រ ដែលជា​កត្តា​ចម្បង​ក្នុង​ការបំផ្លិចបំផ្លាញដល់ផលស្តុកជលផលសមុទ្រនៃសកលលោក។ ការដាក់ចេញ​នូវ​វិធាន​នៃ​ការ​ឧបត្ថម្ភធនជលផល មានសារៈសំខាន់និងមានឥទ្ធិពលជាវិជ្ជមានចំពោះ និរន្តរភាព​នៃ​ផល​ស្តុក​ជលផលសមុទ្រនិងការនេសាទសមុទ្រ។

ក្រោយពី​បានលើកឡើងនូវសំណួរ និងការពិភាក្សាគ្នាយ៉ាងល្អិតល្អន់ ក៏ដូចជាស្ដាប់ការបកស្រាយ ពន្យល់​របស់ឯកឧត្តមរដ្ឋមន្ត្រីក្រសួងកសិកម្មរួចមក ឯកឧត្តម សួស យ៉ារ៉ា ប្រធានអង្គប្រជុំ បាន​ថ្លែង​អំណរគុណចំពោះវត្តមានរបស់ឯកឧត្តមរដ្ឋមន្ត្រី និងសហការី ដែលបាន​អញ្ជើញ​ចូលរួម​ប្រជុំ​ជា​មួយ​គណៈកម្មការជំនាញរបស់រដ្ឋសភា ក្នុងការពិនិត្យសិក្សាលើសេចក្តីព្រាងច្បាប់ស្តីពី ការ​អនុម័ត​យល់ព្រមលើពិធីសារសម្រាប់ធ្វើវិសោធនកម្ម កិច្ចព្រមព្រៀងម៉ារ៉ាកេស ស្តីពីការ​បង្កើត​អង្គការ​ពាណិជ្ជកម្មពិភពលោក ដើម្បីបញ្ចូលកិច្ចព្រមព្រៀងស្តីពីការឧបត្ថម្ភ ធនជលផល។

ឯកឧត្តម សួស យ៉ារ៉ា បញ្ជាក់ថា ដោយពិនិត្យឃើញពីសារ:សំខាន់ នៃសេចក្តី​ព្រាង​ច្បាប់​ខាង​លើ​នេះ គណៈកម្មការជំនាញនៃរដ្ឋសភា បានឯកភាព និងសម្រេចបញ្ជូនសេចក្តីព្រាងច្បាប់នេះ ទៅ​គណៈ​កម្មាធិការអចិន្ត្រៃយ៍រដ្ឋសភា ដើម្បីពិនិត្យ សម្រេចបញ្ចូលក្នុងរបៀបវារៈសម័យប្រជុំរដ្ឋសភា នា​ពេល​ខាងមុខ៕