អាជ្ញាធរខណ្ឌទួលគោក បានដាក់ឱសានវាទ ត្រឹមរយៈពេល៧ថ្ងៃ គិតចាប់ពីថ្ងៃទី១៩ កុម្ភៈ ឆ្នាំ២០២៤នេះ រហូតដល់គម្រប់១សប្តាហ៍ ដោយមិនបន្តឱ្យមានការយកចំណី ឬចិញ្ចើមផ្លូវលេខ ២៤៥ ( មហាវិថីម៉ៅសេងទុង ) ធ្វើជាទីតាំងសម្រាប់អាជីវកម្មលក់ដូរបន្តទៀតនោះឡើយ ក្នុង​ករណី​ដែលពលរដ្ឋជាម្ចាស់ទីតាំង មិនមានការចូលរួមនោះ ​អាជ្ញាធរនឹងមានវិធានការរដ្ឋបាល ។

លោក ស៊ឹប សុផង់ អភិបាលរងខណ្ឌទួលគោក ទទួលបន្ទុកកិច្ចការងារសណ្តាប់ធ្នាប់សាធារណៈ បានប្រាប់ BTV ឱ្យដឹងថា ក្រុមការងារអាជ្ញាធរ បាន​ចុះគូសគំនូស​ដើម្បីជាការកំណត់ចំណាំ​ឱ្យ​ប្រជាពលរដ្ឋលក់ដូរ បានដឹងពីចំណុច​ដែលត្រូវបានហាមឃាត់​មិនឱ្យលក់ដូរ​ហួសចូល​មកចិញ្ចើមផ្លូវ ។

ក្នុងនោះដែរអាជ្ញាធរ បានចុះតាមលំនៅឋានពលរដ្ឋទាំងអស់ នៅប្របសងខាងផ្លូវលេខ២៤៥ ( មហាវិថីម៉ៅសេងទុង ) ដោយបានជូនលិខិតជូនដំណឹងរបស់រដ្ឋបាលខណ្ឌជូនពួកគាត់ និង​បាន​ពន្យល់​ណែនាំដោយផ្ទាល់មាត់បន្ថែមផង​ ឱ្យពួកគាត់បានយល់ដឹង នឹង​ចូលរួម​គោរព​ឱ្យបាន​ខ្ជាប់ខ្ជួន មុនពេល​ដែលអាជ្ញាធរឈានដល់វិធានការរដ្ឋបាល ​ដោយប្រើវិធានការក្តៅ នៅពេលឆាប់ៗ​ខាងមុខនេះ ។

ពលរដ្ឋ ដែលមានលំនៅឋាននៅលើដងផ្លូវខាងលើ ​ក៏បាន​បង្ហាញ​អារម្មណ៍​រីករាយ ​និងពេញចិត្ត​ចំពោះការ​ចូលរួមគោរព ​និងសហការជាមួយក្រុមការងារ​អាជ្ញាធរខណ្ឌ ​ដែលបានចុះរៀបចំ​សណ្តាប់ធ្នាប់​ និងរបៀបរៀបរយសាធារណៈ ឱ្យមានភាពល្អប្រសើរឡើងនោះ ។

គួរបញ្ជាក់ថា បញ្ហាសណ្តាប់ធ្នាប់របៀបរៀបរយ នៅលើមហាវិថីម៉ៅសេងទុង ​និងផ្លូវមួយចំនួនទៀត នៅក្បែរ ​និងជុំវិញផ្សារដើមគរ និងផ្សារនាគមាសជាដើម ​តែង​ត្រូវបានក្រុមការងារអាជ្ញាធរខណ្ឌ​មាន​វិធានការចុះរដ្ឋបាលរៀបចំជាបន្តបន្ទាប់មករហូត ​ប៉ុន្តែការរៀបចំកន្លងមក ហាក់នៅមិនទាន់​ទទួល​បាន​ប្រសិទ្ធភាព​ល្អប្រសើរនៅឡើយទេ ​ខណៈការ​លក់​ដូរ​យ៉ាង​អានាធិបតេយ្យ​ពាសពេញ​លើដងផ្លូវ​នៅតែបន្ត​ឧស្សាហ៍​កើតមាន ​ពិសេសនៅ​វេលាយប់ និងវេលាទាបភ្លឺ ៕ អត្ថបទ ៖ លីហេង