យោងតាមទំនាក់ទំនងផ្ទៃក្នុង និងមន្ត្រីដឹងអំពីបញ្ហាជម្លោះបានឲ្យដឹងថា ក្រសួងការបរទេសអាមេរិក បានទទួលការព្រមានជាច្រើនពីបណ្ដាញភ្នាក់ងាររបស់ខ្លួននៅមជ្ឈិមបូព៌ាក្នុងកំឡុងប៉ុន្មានសប្តាហ៍ថ្មីៗនេះអំពីផលប៉ះពាល់យូរអង្វែងពីជំហរបស់សហរដ្ឋអាមេរិក លើជម្លោះនៅតំបន់ហ្កាហ្សា ដែលបង្កឱ្យមានកិច្ចប្រជុំបន្ទាន់នៅទីក្រុងវ៉ាស៊ីនតោន ជាមួយភ្នាក់ងារស៊ើបការណ៍ដើម្បីវាយតម្លៃផលប៉ះពាល់នេះ។

ភ្នាក់ងារមួយពីបេសកកម្មអាមេរិក នៅក្នុងប្រទេសម៉ារ៉ុក បាននិយាយថា អតីតអ្នកសហការក្នុងប្រទេសនេះបានអះអាងថា សហរដ្ឋអាមេរិកបានក្លាយទៅជា «ធាតុពុល» ក្នុងសង្គមដោយសារតែការគាំទ្ររបស់រដ្ឋបាលខ្លួនចំពោះអ៊ីស្រាអែល។

អ្នកការទូតនៅបណ្ដាញផ្សេងទៀតនៅមជ្ឈិមបូព៌ា បានសម្តែងការព្រួយបារម្ភស្រដៀងគ្នានេះ ដោយទំនោរសង្គមនៅក្នុងប្រទេស ដែលកាន់សាសនាឥស្លាមភាគច្រើន នៅក្នុងតំបន់ផ្សេងទៀតនៃពិភពលោកដូចជាប្រទេសឥណ្ឌូនេស៊ី ក៏បានសម្តែងមនោសញ្ចេតនាយល់ច្រឡំនឹងអាមេរិកស្រដៀងគ្នានេះដែរ។

ការប៉ះទង្គិចដ៏យូរអង្វែងចំពោះប្រជាប្រិយភាពរបស់សហរដ្ឋអាមេរិកនៅមជ្ឈិមបូព៌ា អាចមានការប៉ះពាល់យ៉ាងទូលំទូលាយសម្រាប់ផ្នែកការទូត រួមទាំងកិច្ចខិតខំប្រឹងប្រែងក្នុងការកសាងសម្ព័ន្ធនៃបណ្ដាប្រទេសដើម្បីជួយកសាងតំបន់ហ្កាហ្សាឡើងវិញ បន្ទាប់ពីសង្គ្រាមបញ្ចប់ និងលើកទឹកចិត្តឱ្យមានទំនាក់ទំនងធម្មតាជាមួយអ៊ីស្រាអែល៕