​បាល់ទាត់៖ ​ខ្សែប្រយុទ្ធ​អង់គ្លេស Danny Ings​ បាន​បដិសេធ​សំណើ​កិច្ចសន្យា​ថ្មី​ជាមួយ Southampton ស្របពេល​កិច្ចសន្យា​ចាស់​នៅសល់តែ ១ឆ្នាំ​ទៀត​ប៉ុណ្ណោះ​។ ​​Danny Ings ​បាន​បដិសេធ​សំណើ​ដ៏​ធំ​មួយ​ពី Southampton ដែល​ហ៊ាន​ឱ្យ​កិច្ចសន្យា​កីឡាករ​វ័យ ២៨ឆ្នាំ​រូបនេះ ៤ឆ្នាំ​បន្ថែម និង​ផ្តល់ប្រាក់​ឈ្នួល​ថ្លៃ​បំផុត​មិន​ធ្លាប់មាន​នៅក្នុង​ក្លិប​ផងដែរ​។

​​Danny Ings ​ធ្លាប់បាន​ប្រាប់​ហើយ​ថា​ គេ​ចង់​ប្រឡូក​ជាមួយ​ក្លិប​ដែលមាន​កំរិត​ខ្ពស់​។ អតីត​កីឡាករ Burnley ​រូបនេះ​ធ្លាប់​លេង​ឱ្យ​ Liverpool ផងដែរ​ តែ​សោកស្តាយ​នៅពេល​នោះគេ​មិនអាច​បញ្ចេញ​សមត្ថភាព​ឱ្យអស់​បាន​ ដោយសារ​របួស​ជង្គង់​ធ្ងន់​ពីរលើក​។ ​​តែ​តាំងពី​មកដល់ Southampton កាលពី​ឆ្នាំ២០១៩ មកដល់ពេលនេះ Danny Ings​ ស៊ុត​បញ្ចូល​ទី​បាន ៣៤គ្រាប់​ក្នុងការ​បង្ហាញខ្លួន ៦៧លើក​ដែល​ក្នុងនោះ​មាន​គ្រាប់​បាល់​នៅ English Premier League ៥០គ្រាប់​។

​​ទំរង់​លេង​អស្ចារ្យ​របស់ Danny Ings​ រដូវ​កាល​មុន​ក៏បាន​ធ្វើឱ្យ​លោក Gareth Southgate កោះ​ហៅចូល​ក្រុម​ជំរើសជាតិ​អង់គ្លេស​ផងដែរ​ ក្នុង​ការប្រកួត​អន្តរជាតិ​កាលពី​ខែកញ្ញា និង​តុលា​ឆ្នាំមុន តែ​សោក​ស្តាយ​ដែល​មិនមាន​ឈ្មោះ​នៅ Euro ២០២០ នេះ​ដោយសារ​របួស​មិនទាន់​ជា ១០០% បូករួម​ទាំង​តេស្ត​វិជ្ជមាន Covid-19 មុន​ចប់​រដូវ​កាល English Premier League​។ Manchester City ជា​ក្លិប​ធំ​មួយ​ដែលមាន​ទំនាក់ទំនង​ចង់បាន​កីឡាករ​វ័យ ២៨ឆ្នាំ​រូបនេះ ខណៈ​​កន្លងមក Manchester United និង Tottenham Hotspur ក៏​ធ្លាប់​ទាក់ទង​ផងដែរ​៕

​អត្ថបទ​៖​នាង សុភា​វុ​ធ