អតីតប្រធានាធិបតីរុស្ស៊ី លោក ឌ្មីទ្រី ម៉េដវ៉េដេវ បានគំរាមលោកខាងលិចម្តងទៀតថា នឹងមានសង្គ្រាមនុយក្លេអ៊ែរទាំងស្រុង ប្រសិនបើរុស្ស៊ី ត្រូវបានរុញច្រានត្រឡប់ទៅព្រំដែនឆ្នាំ១៩៩១ ដែលទទួលស្គាល់ជាអន្តរជាតិរបស់ខ្លួន បន្ទាប់ពីសង្គ្រាមនៅអ៊ុយក្រែន។

នៅក្នុងការបង្ហោះនៅលើបណ្តាញសង្គមTelegram កាលពីថ្ងៃអាទិត្យ អនុប្រធានបច្ចុប្បន្ននៃក្រុមប្រឹក្សាសន្តិសុខរុស្ស៊ី បានរំលឹកឡើងវិញនូវជំហរដ៏ច្បាស់លាស់របស់ខ្លួនថា៖«មហាអំណាចនុយក្លេអ៊ែរ មិនដែលចាញ់សង្រ្គាមទេ» ដរាបណាពួកគេការពារមាតុភូមិរបស់ពួកគេនោះ។

នៅក្នុងការពិសោធន៍រយៈពេលដ៏ខ្លី លោកបានពិភាក្សាអំពីករណីជោគជ័យរបស់អ៊ុយក្រែន ក្នុងសង្រ្គាមនេះ។ តាមគំនិតរបស់លោក ការវិលត្រឡប់របស់អ៊ុយក្រែនទៅកាន់ព្រំដែនចាស់របស់ខ្លួន នឹងផ្ទុយនឹងរដ្ឋធម្មនុញ្ញរុស្ស៊ី ជាពិសេសនៅពេលដែលទឹកដីដែលបានដណ្តើមបាននៅភាគខាងកើតអ៊ុយក្រែន និងគ្រីម៉េ ត្រូវបានបញ្ចូលជាផ្នែកសំខាន់នៃប្រទេសរុស្ស៊ីរួចទៅហើយ។

ព្រំដែនឆ្នាំ ១៩៩១ គឺជាខ្សែបន្ទាត់ព្រំដែនរួមដែលត្រូវបានទទួលស្គាល់ជាអន្តរជាតិរបស់រុស្ស៊ី និងអ៊ុយ   ក្រែន មុនពេលការបញ្ចូលឧបទ្វីបគ្រីម៉េ ដោយទីក្រុងមូស្គូក្នុងឆ្នាំ ២០១៤ និងមុនពេលការលុកលុយពេញលក្ខណៈរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២។