មន្ត្រីបក្សសំខាន់មួយរូប បាននិយាយថា គណបក្សធំៗទាំងពីររបស់ប៉ាគីស្ថាន គ្រោងនឹងជួបប្រជុំគ្នានៅថ្ងៃចន្ទនេះ ដើម្បីព្យាយាមដោះស្រាយភាពខ្វែងគំនិតគ្នាលើការបង្កើតរដ្ឋាភិបាលចម្រុះមួយ បន្ទាប់ពីការបោះឆ្នោតដែលមិនទាន់បានព្រមព្រៀងគ្នាពិតប្រាកដ ដោយគូសបញ្ជាក់អស្ថិរភាពនយោបាយ និងសេដ្ឋកិច្ចរបស់ខ្លួន។

អ្នកវិភាគនិយាយថា ប្រទេសដែលប្រដាប់ដោយអាវុធនុយក្លេអ៊ែរ មានប្រជាជនចំនួន ២៤១លាននាក់ ដែលកំពុងប្រឈមនឹងវិបត្តិសេដ្ឋកិច្ច ចំពេលមានកំណើនយឺត និងអតិផរណាកំណត់ត្រា រួមជាមួយនឹងការកើនឡើងនៃអំពើហិង្សារបស់ក្រុមសកម្មប្រយុទ្ធ ត្រូវការរដ្ឋាភិបាលដែលមានស្ថិរភាពជាមួយនឹងអាជ្ញាធរដើម្បីធ្វើការសម្រេចចិត្តដ៏តឹងតែង។

កិច្ចពិភាក្សានៅថ្ងៃចន្ទនេះ នឹងក្លាយជាជុំទី៥ បន្ទាប់ពីអតីតនាយករដ្ឋមន្ត្រី លោក សេបាស ហ្សារិហ្វ ( Shehbaz Sharif) ត្រូវបានជ្រើសរើសដោយគណបក្សសម្ព័ន្ធមូស្លីមប៉ាគីស្ថានណាវ៉ាស (PML-N) ដើម្បីដឹកនាំប្រទេសម្តងទៀត។

លោក អ៊ីហ្សាក់ ដា (Ishaq Dar) សមាជិកព្រឹទ្ធសភានៃគណបក្សរបស់លោកហ្សារិហ្វ ដែលកំពុងដឹកនាំកិច្ចពិភាក្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យដែលបានបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា៖«ភាគីទាំងពីរ មិនទាន់បានយល់ព្រមលើចំណុចចុងក្រោយនៅឡើយទេ»។