ភរិយាមេម៉ាយរបស់លោក Alexei Navalny ដែលជាគូអរិរបស់ប្រធានាធិបតីរុស្ស៊ី លោក Vladimir Putin និងដែលបានស្លាប់នៅក្នុងពន្ធនាគារ Arctic កាលពីសប្តាហ៍មុន ចូលរួមជាមួយរដ្ឋមន្ត្រីការបរទេសរបស់សហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្ស៊ិក នៅថ្ងៃចន្ទ (ទី១៩ ខែកុម្ភៈ) ពោលគឺប៉ុន្មានថ្ងៃនៅមុនសង្រ្គាមរុស្ស៊ី ក្នុងប្រទេសអ៊ុយក្រែន ឈានដល់រយៈពេល ២ឆ្នាំ។

កាលពីថ្ងៃសុក្រ (ទី១៧ ខែកុម្ភៈ) អំឡុងការជួបប្រជុំនៃបណ្ដាមេដឹកនាំរបស់លោកខាងលិច អ្នកការទូត និងមន្ត្រីផ្សេងទៀត នៅទីក្រុង Munich ប្រទេសអាល្លឺម៉ង់ លោកស្រី Yulia Navalnaya បានប្រាប់ថា៖ «លោក Putin និងសម្ព័ន្ធមិត្តរបស់លោក នឹងទទួលខុសត្រូវ «ចំពោះអ្វីដែលពួកគេបានធ្វើ ចំពោះប្រទេសរបស់យើង គ្រួសាររបស់ខ្ញុំ ចំពោះស្វាមីរបស់ខ្ញុំ»។

នៅថ្ងៃចន្ទនេះ ប្រធាននៃការពិភាក្សារបស់រដ្ឋមន្ត្រីការបរទេសទាំង២៧ របស់ប្លុក គឺប្រធានគោលនយោបាយការបរទេសលោក Josep Borrell បានប្រកាសពីដំណើរទស្សនកិច្ចរបស់លោកស្រី Navalnaya ដោយនិយាយថា ការជួបជុំនេះនឹងបង្ហាញពី «ការគាំទ្រដល់អ្នកតស៊ូ ដើម្បីសេរីភាពនៅក្នុងប្រទេសរុស្ស៊ី និងគោរពដល់ការចងចាំរបស់លោក Alexei Navalny»។

លោក Navalny ដែលជាអតីតមេធាវីវ័យ ៤៧ឆ្នាំ បានលេចធ្លោយ៉ាងធ្លោក្នុងយុទ្ធនាការប្រឆាំងនឹងអំពើពុករលួយនៅក្នុងប្រទេសរុស្ស៊ីរបស់លោក Putin។ រូបលោកត្រូវបានគេស្គាល់យ៉ាងច្បាស់ដោយសារវោហាសាស្ត្រមិនញញើតអ្នកណារបស់លោក នៅឯការតវ៉ាជាសាធារណៈ និងនៅក្នុងបន្ទប់សវនាការ ការបញ្ចេញសំឡេងឥតសំចៃមាត់នៅលើបណ្ដាញទំនាក់ទំនងសង្គម និងការស៊ើបអង្កេតវីដេអូយ៉ាងលម្អិតពីក្រុមរបស់លោក ទាក់ទងនឹងអំពើពុករលួយរបស់រដ្ឋ។

អាជ្ញាធររុស្ស៊ីបានឲ្យដឹងថា រូបលោកបានដួលបន្ទាប់ពីការដើរលេងនៅមន្ទីរឃុំឃាំង Polar Wolf ជាកន្លែងដែលរូបលោកត្រូវអនុវត្តការជាប់ទោសរយៈពេល ៣ទសវត្សរ៍ បន្ទាប់ពីមានការធ្វើទុក្ខបុកម្នេញជាច្រើនឆ្នាំដែលក្នុងនោះរួមបញ្ចូលការបំពុលជាមួយសារធាតុប៉ះពាល់ដល់ប្រព័ន្ធប្រសាទ នៅតំបន់ Siberia ក្នុងឆ្នាំ២០២០។

គួរបញ្ជាក់ថា ក្នុងការជួបជុំនេះ បណ្ដារដ្ឋមន្ត្រីទាំងអស់គ្រោងនឹងពិភាក្សាអំពីការគាំទ្រផ្នែកយោធាសម្រាប់ប្រទេសអ៊ុយក្រែន និងអ្វីដែលជាកញ្ចប់ទណ្ឌកម្មទី១៣ របស់សហភាពអឺរ៉ុបប្រឆាំងនឹងទីក្រុងមូស្គូ ចាប់តាំងពីប្រទេសនេះបានធ្វើការលុកលុយទ្រង់ទ្រាយធំលើប្រទេសជិតខាងរបស់ខ្លួន កាលពីថ្ងៃទី២៤ ខែកុម្ភៈ ឆ្នាំ២០២២៕