ភ្នំពេញ៖ នៅព្រឹកថ្ងៃទី១៩ ខែកុម្ភៈ ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំ យុវជន និងកីឡា បានចូលរួមជាអធិបតីក្នុងកម្មវិធីបើកសម្ពោធការអនុវត្តគម្រោង UNICATION Erasmus (Unify Communication by International Projects) ក្នុងប្រទេសកម្ពុជា និងហ្វីលីពីន ដែលឧបត្ថម្ភគាំទ្រដោយសហភាពអឺរ៉ុប EU និងមានការចូលរួមពីសំណាក់ ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា លោកជំទាវ Maria Amelita C. Aquino ឯកអគ្គរដ្ឋទូតហ្វីលីពីនប្រចាំព្រះរាជាណាចក្រកម្ពុជា

វេជ្ជបណ្ឌិត Natacha Moniz អ្នកសម្របសម្រួល UNICATION វិទ្យាស្ថាន Superior Tecnico (IST) និង លោកជំទាវ ទេព កុលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ (PPIU) នៅទីតាំងសាកលវិទ្យាល័យភ្នំពេញអន្តរជាតិ (PPIU)។ ព្រមទាំងថ្នាក់ដឹងនាំក្រសួងជាច្រើនរូបទៀត។

ក្នុងឱកាសនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំ យុវជន និងកីឡា បានកោតសរសើរ និង ថ្លែងអំណរគុណចំពោះការគាំទ្ររបស់សហភាពអឺរ៉ុប ដែលសហការផ្តល់មូលនិធិដល់គម្រោង UNIFICATION Eramus ក៏ដូចជាកោតសរសើរ និងវាយតម្លៃខ្ពស់ចំពោះ សាកលវិទ្យាល័យភ្នំពេញអន្តរជាតិ (PPIU) ក្នុងភាពជាដៃគូអនុវត្តគម្រោងប្រកបដោយការទទួលខុសត្រូវខ្ពស់ ដោយជឿជាក់ថាគម្រោងនេះនឹងនាំមកនូវលទ្ធផលជាផ្លែផ្កា និងផលិតភាពបន្ថែមទៀតសម្រាប់កិច្ចសហប្រតិបត្តិការរយៈពេលវែង ស្របតាមចក្ខុវិស័យកែលម្អគុណភាពអប់រំឧត្ដមសិក្សានៅកម្ពុជា ឈានទៅសម្រេចគោលដៅអភិវឌ្ឍមូលធនមនុស្ស និងជំរុញការផ្លាស់ប្តូរបទពិសោធន៍រវាងប្រជាជនសហគមន៍អឺរ៉ុប និងអាស៊ី។

ឯកឧត្តមថ្លែងថា គម្រោងនេះក៏ជានិមិត្តរូបនៃកិច្ចខិតខំប្រឹងប្រែងរួមគ្នា និងការប្ដេជ្ញាចិត្តយ៉ាងមុតមាំរវាងភាគីពាក់ព័ន្ធទាំងអស់ ដោយផ្តោតជាចម្បងលើការកសាងសមត្ថភាព ការបង្កើនជំនាញទំនាក់ទំនង អន្តរវប្បធម៌ និង ការគ្រប់គ្រងគម្រោងនានា តាមរយៈការចែករំលែកចំណេះដឹង បទពិសោធន៍ និងការអភិវឌ្ឍសមត្ថភាពជំនាញរបស់មន្ត្រីទទួលបន្ទុកការិយាល័យអន្តរជាតិរបស់សាកលវិទ្យាល័យនីមួយៗ (HEIs) ដែលពាក់ព័ន្ធ ដើម្បីឈានទៅជំរុញកិច្ចសហប្រតិបត្តិការរវាងសាកលវិទ្យាល័យក្នុងសហគមន៍អឺរ៉ុប និងអាស៊ាន។

តាមរយៈគម្រោង UNIFICATION Eramus ក្រសួងអប់រំ យុវជន និងកីឡា រំពឹងថា នឹងផ្តល់នូវអត្ថប្រយោជន៍ជាច្រើនដល់ការអភិវឌ្ឍវិស័យអប់រំឧត្តមសិក្សា និងការផ្សារភ្ជាប់ទំនាក់ទំនងរវាងអឺរ៉ុប និងអាស៊ី ដូចជា៖

(១). ពង្រឹងកិច្ចសហការ និងការចែករំលែកចំណេះដឹង (Enhanced Collaboration and Knowledge Sharing)៖ តាមរយៈការសម្របសម្រួលភាពជាដៃគូរវាងសាកលវិទ្យាល័យក្នុងសហគមន៍អឺរ៉ុប និងអាស៊ី ដោយគម្រោងនេះអាចបង្កើតជាបណ្តាញសម្រាប់ការស្រាវជ្រាវរួមគ្នា ការបណ្តុះបណ្តាល ការផ្លាស់ប្តូរមហាវិទ្យាល័យ និងការអភិវឌ្ឍកម្មវិធីសិក្សា។ កិច្ចសហការឆ្លងទ្វីបនេះ នឹងនាំទៅរករបកគំហើញថ្មីៗ និងចែករំលែកឧត្តមានុវត្តន៍ឈានទៅលើកកម្ពស់វិស័យអប់រំនៅកម្ពុជា។

(២). យល់ដឹងពីវប្បធម៌ និងការគោរពគ្នាទៅវិញទៅមក(Mutual Cultural Understanding and Respect)៖ តាមរយៈកម្មវិធីផ្លាស់ប្តូរនិស្សិត ជំរុញការយល់ដឹងអំពីវប្បធម៌ ការយល់ចិត្ត និងការគោរព ដែលត្រួសត្រាយផ្លូវសម្រាប់ទំនាក់ទំនងអន្តរជាតិកាន់តែរឹងមាំ និងកិច្ចសហការក្នុងវិស័យផ្សេងៗ។

(៣). ធ្វើពិពិធកម្មវិស័យអប់រំ (Diversification of Educational Landscape) ៖ សិក្សាស្វែងយល់ពីគ្នាទៅវិញទៅមក និងពង្រីកវិសាលភាពនៃចំណេះដឹង បង្កើតបរិយាកាសសិក្សាដែលរួមបញ្ចូលកាន់តែច្រើនសម្រាប់សិស្សមកពីទ្វីបទាំងពីរ។

(៤). ជំរុញឱ្យមានការងារធ្វើ និងអាជីពជាសកល (Boosting Employability and Global Careers) ៖ ផ្តល់ជូននិស្សិតបញ្ចប់ការសិក្សានូវ ជំនាញអន្តរវប្បធម៌ ការហ្វឹកហាត់សម្របខ្លួន ការយល់ដឹងជាសកល និងការគ្រប់គ្រងគម្រោងដើម្បីទទួលបានបទពិសោធន៍ក្នុងការរៀបចំខ្លួនឱ្យរួចរាល់សម្រាប់អាជីពនៅក្នុងទីផ្សារការងារសកល។

(៥). ពង្រឹងចំណងមិត្តភាពអន្តរជាតិ (Strengthening International Ties)៖

ពេលដែលនិស្សិត ផ្សារភ្ជាប់ទំនាក់ទំនងយូរអង្វែងជាមួយសាកលវិទ្យាល័យ នឹងឈានទៅពង្រឹងពង្រីកកិច្ចសហប្រតិបត្តិការនានា ដែលធ្វើឱ្យប្រសើរឡើងនូវទំនាក់ទំនងអន្តរជាតិរវាងបណ្តាប្រទេសនៅអឺរ៉ុប និងកម្ពុជាផងដែរ៕ ដោយ ៖ ដារា