វិមានក្រឹមឡាំង នៅថ្ងៃចន្ទ (ទី១៩ ខែកុម្ភៈ) នេះ បាននិយាយថា ប្រតិកម្មរបស់លោកខាងលិច ចំពោះការស្លាប់របស់លោក Alexei Navalny គឺមិនអាចទទួលយកបាននោះទេ តែថា សេចក្តីថ្លែងការណ៍ដ៏គួរឲ្យស្អប់ខ្ពើមរបស់សហរដ្ឋអាមេរិក និងអឺរ៉ុប នឹងមិនអាចបំផ្លាញប្រធានាធិបតីរុស្ស៊ី លោក Vladimir Putin បាននោះឡើយ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងចាត់ទុកថា នេះពិតជាមិនអាចទទួលយកបាននោះទេ ក្នុងការធ្វើសេចក្តីថ្លែងការណ៍ដ៏គួរឲ្យស្អប់ខ្ពើមបែបនោះ»។ តែលោក Peskov បានបន្ថែមថា៖ «ពិតណាស់ សេចក្តីថ្លែងការណ៍ទាំងនេះ មិនអាចបង្កឲ្យមានការខូចខាតណាមួយដល់ប្រមុខរដ្ឋរបស់យើងបាននោះឡើយ»។

លោក Peskov បានប្រាប់ថា ការស៊ើបអង្កេតលើការស្លាប់របស់លោក Navalny កំពុងបន្តធ្វើ ហើយកំពុងត្រូវបានធ្វើឡើងស្របតាមច្បាប់របស់រុស្ស៊ី។ នៅពេលសួរថា តើលោក Putin មានប្រតិកម្មយ៉ាងណា ចំពោះព័ត៌មាននៃការស្លាប់នោះ លោក Peskov បានឆ្លើយតបថា៖ «ខ្ញុំគ្មានអ្វីត្រូវបន្ថែមទេ»។

គួរបញ្ជាក់ថា ការស្លាប់របស់អ្នករិះគន់លើវិមានក្រឹមឡាំងដែលកំពុងជាប់ពន្ធនាគារ បាននាំឲ្យមានការថ្កោលទោសភ្លាមៗពីបណ្ដាមេដឹកនាំអន្តរជាតិ មន្ត្រីជាន់ខ្ពស់លោកខាងលិច និងឥស្សរជនប្រឆាំងរបស់រុស្ស៊ី កាលពីថ្ងៃសុក្រ (ទី១៦ ខេកុម្ភៈ) ដោយបានថ្កោលទោសយ៉ាងខ្លាំងក្លាលើរុស្ស៊ី និងបានហៅការស្លាប់នេះថា ជា «សញ្ញាបន្ថែមទៀតនៃភាពឃោរឃៅរបស់លោក Putin»៕