តាមឯកសារដែលទីភ្នាក់ងារសារព័ត៌មាន Reuters បានឃើញ បានបង្ហាញថា គណៈកម្មការអឺរ៉ុបបានចាប់ផ្ដើមដំណើរការនីតិវិធីផ្លូវការប្រឆាំងនឹងបណ្ដាញសង្គម TikTok របស់ក្រុមហ៊ុន ByteDance ក្រោមច្បាប់សេវាកម្មឌីជីថល (DSA) ដើម្បីពិនិត្យមើលថា តើវេទិកាបណ្ដាញសង្គមមួយនេះ កំពុងធ្វើការបានគ្រប់គ្រាន់ដើម្បីការពារកុមារដែរ ឬទេ។

ក្នុងឯកសារនោះ ស្នងការសហភាពអឺរ៉ុប លោក Thierry Breton បានប្រាប់ឲ្យដឹងថា៖ «ការការពារអនីតិជន គឺជាអាទិភាពនៃការអនុវត្ត សម្រាប់ DSA។ ក្នុងនាមជាវេទិកាដែលមានឥទ្ធិពលលើកុមារ និងក្មេងជំទង់រាប់លាននាក់នោះ បណ្ដាញសង្គម TikTok ត្រូវតែគោរពឲ្យបានខ្ជាប់ខ្ជួនតាម DSA និងមានតួនាទីជាពិសេស ក្នុងការការពារអនីតិជនតាមប្រព័ន្ធអ៊ីនធឺណិត»។

នេះជាការស៊ើបអង្កេតលើកទី២ របស់ DSA បន្ទាប់ពីបណ្ដាញសង្គម X របស់លោក Elon Musk។ ហើយបណ្ដាញសង្គម Tik Tok អាចប្រឈមនឹងការផាកពិន័យរហូតដល់ ៦ភាគរយនៃប្រាក់ចំណូលសកលរបស់ខ្លួន ប្រសិនបើរកឃើញថា មានកំហុសក្នុងការបំពានច្បាប់ DSA៕