អ្នកនាំពាក្យយោធារបស់ក្រុមហ៊ួទី លោក Yahya Sarea បានប្រាប់ឲ្យដឹងនៅក្នុងសេចក្តីថ្លែងការណ៍ នាថ្ងៃចន្ទ (ទី១៩ ខែកុម្ភៈ) ថា ក្រុមឧទ្ទាមរបស់ប្រទេសយេម៉ែនមួយនេះ បានវាយប្រហារលើនាវាដឹកទំនិញ Rubymar នៅក្នុងឈូងសមុទ្រ Aden ហើយឥឡូវនេះ នាវានោះប្រឈមនឹងការលិច។

លោកបានបន្តថា នាវានោះជារបស់ចក្រភពអង់គ្លេស ហើយក្រុមនាវិកមានសុវត្ថិភាពធម្មតា ហើយជាមួយគ្នានេះ លោកបានបន្ថែមថា ក្រុមហ៊ួទីក៏បានបាញ់ទម្លាក់យានដ្រូនរបស់អាមេរិក នៅទីក្រុង Hodeidah ផងដែរ។

ក្រុមហ៊ុនសន្តិសុខដែនសមុទ្ររបស់អង់គ្លេស Ambrey បាននិយាយថា នាវាដឹកទំនិញទូទៅដែលមានទង់ជាតិប្រទេសបេលី ចុះបញ្ជីដោយចក្រភពអង់គ្លេស និងលីបង់ បានរងការវាយប្រហារ នៅច្រកសមុទ្រ Bab al-Mandab ម្ដុំប្រទេសយេម៉ែន កាលពីថ្ងៃអាទិត្យ (១៨ ខែកុម្ភៈ)។

ទីភ្នាក់ងារប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស បានរាយការណ៍ថា នាវិកបានបោះបង់ចោលកប៉ាល់ នៅម្ដុំសមុទ្រប្រទេសយេម៉ែន បន្ទាប់ពីមានការផ្ទុះ៕