បុរសជនជាតិអាមេរិកម្នាក់បានឡើងសវនាការនៅប្រទេសអាល្លឺម៉ង់ នាថ្ងៃចន្ទ (ទី១៩ ខែកុម្ភៈ) នេះ ដោយត្រូវបានចោទប្រកាន់ពីបទធ្វើឃាតលើអ្នកទេសចរជាស្ត្រីម្នាក់ និងធ្វើឲ្យម្នាក់ទៀតរងរបួសយ៉ាងធ្ងន់ធ្ងរ ក្នុងការវាយប្រហារនៅក្បែរប្រាសាទ Neuschwanstein ដ៏ល្បីល្បាញលើពិភពលោក កាលពីខែមិថុនាឆ្នាំមុន។

នគរបាលក្នុងតំបន់បានឲ្យដឹងនៅក្នុងសេចក្តីថ្លែងការណ៍ថា នារីវ័យ ២១ឆ្នាំម្នាក់ដែលត្រូវបានបញ្ជូនទៅកាន់មន្ទីរពេទ្យដោយឧទ្ធម្ភាគចក្រ បានស្លាប់ នៅពេលយប់ដោយសាររូបនាងរងរបួសធ្ងន់ធ្ងរពេក ខណៈដែលមិត្រភក្ដិរបស់នាងវ័យ ២២ឆ្នាំ កំពុងសម្រាកនៅមន្ទីរពេទ្យនៅឡើយ។

យោងតាមអ្នកនាំពាក្យរបស់តុលាការ នៅទីក្រុង Kempten ភាគខាងត្បូង ជនជាប់ចោទដែលត្រូវបានកំណត់ឈ្មោះត្រឹមតែ Troy B. តាមច្បាប់អាល្លឺម៉ង់ និងមានអាយុ ៣០ឆ្នាំ នៅពេលប្រព្រឹត្តឧក្រិដ្ឋកម្ម «ត្រូវបានចោទប្រកាន់ថា បានរុញទម្លាក់ជនរងគ្រោះម្នាក់ចូលទៅក្នុងជ្រលងភ្នំ Poellat»។

អ្នកនាំពាក្យលោក Ferdinand Siebert បានប្រាប់អ្នកសារព័ត៌មានថា ជនជាប់ចោទបន្ទាប់មក បានវាយប្រហារជនលើរងគ្រោះទី២។ ហើយជនសង្ស័យត្រូវបានចាប់ខ្លួនភ្លាមៗ បន្ទាប់ពីមានប្រតិបត្តិការដ៏ធំរបស់នគរបាល៕