តាមដងផ្លូវនានាដ៏តូចចង្អៀតក្នុងទីក្រុងភាគខាងត្បូងបំផុតនៃទីក្រុងរ៉ាហ្វាតំបន់ហ្កាហ្សា ត្រូវបានពេញណែនដោយពលរដ្ឋប៉ាឡេស្ទីនរាប់ម៉ឺននាក់ដែលបានរត់ភៀសខ្លួនចេញពីសង្រ្គាមកាលពីថ្ងៃចន្ទទី១៩ខែកុម្ភៈ សុទ្ធតែព្រួយបារម្ភយ៉ាងខ្លាំងអំពីការឈ្លានពាននាពេលខាងមុខរបស់កងម្លាំងអ៊ីស្រាអែល។

ក្រុងរ៉ាហ្វា ដែលមានព្រំប្រទល់ជាប់ប្រទេសអេហ្ស៊ីប គឺជាទីកន្លែងមានសវុត្ថិភាពចុងក្រោយក្នុងដែនដីហ្កាហ្សា និងជាផ្ទះសម្រាប់ពលរដ្ឋប៉ាឡេស្ទីន ដែលត្រូវបានបណ្ដេញចេញពីភាគខាងជើង និងភាគកណ្ដាលនៃតំបន់ហ្កហ្សាស្ទ្រីប ដោយប្រតិបត្តិការយោធារបស់អ៊ីស្រាអែល បន្ទាប់ពីការវាយប្រហារកាលពីថ្ងៃទី៧ខែតុលា ពីសំណាក់ក្រុមហាម៉ាស។

ប្រជាពលរដ្ឋបាននិយាយថា ពួកគេពុំមានអាហារហូបចុកគ្រប់គ្រាន់ ស្ថានភាពអនាម័យមិនល្អ ហើយជំងឺផ្សេងៗកំពុងឆ្លងរាតត្បាត។មន្ត្រី៤រូបដែលបានដឹងពីស្ថានភាពនេះ បាននិយាយអ៊ីស្រាអែល រំពឹងថានឹងបន្តប្រតិបត្តិការពេញបន្ទុកក្នុងតំបន់នេះរយៈពេល៦ទៅ៨ សប្ដាហ៍ទៀត ខណៈត្រៀមឈ្លានពានដោយថ្មើរជើងចូលក្នុងទីក្រុងរ៉ាហ្វា ។

យោងតាមប្រភពចំនួន២ ក្រុមម្រមុខយោធា ជឿថាពួកគេអាចកម្ទេចសមត្ថភាពយោធាដែលនៅសេសសល់របស់ក្រុមហាម៉ាសនៅពេលនោះ ជាការត្រួសត្រាយផ្លូវសម្រាប់ការផ្លាស់ប្ដូរដំណាក់កាលវាយប្រហារដោយថ្មើរជើងទៅជាការដាក់គោលដៅដោយការវាយប្រហារតាមអាកាស និងប្រតិបត្តិការកងកម្លាំងពិសេស។

ក្រសួងសុខាភិបាលដែនដីហ្កាហ្សាបាននិយាយកាលពីថ្ងៃចន្ទថា មនុស្សយ៉ាងហោចណាស់២៩.០៩២នាក់ បានស្លាប់ និងមនុស្សចំនួន៦៩.០២៨នាក់ ផ្សេងទៀតបានរងរបួសក្នុងការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីប ចាប់តាំងពីថ្ងៃទី៧ខែតុលាមក។ក្រសួងនេះបានបន្ថែមថា ក្នុងរយៈពេល២៤ម៉ោងចុងក្រោយនេះ ជនជាតិប៉ាឡេស្ទីនចំនួន១០៧នាក់ បានស្លាប់ និង១៤៥នាក់រងរបួសក្នុងការវាយលុកឥតឈប់របស់អ៊ីស្រាអែល ៕