មកដល់ពាក់កណ្តាលខែកុម្ភៈ ឆ្នាំ២០២៤នេះ មានពលរដ្ឋខ្មែរប្រកបរបរ​នៅក្នុងសេដ្ឋកិច្ច​ក្រៅ​ប្រព័ន្ធ បានធ្វើបណ្ណបេឡាជាតិសន្តិសុខសង្គម ប.ស.ស មានប្រមាណជាង ១៤ម៉ឺន ៦ពាន់នាក់ និង​បាន​ផ្តល់បណ្ណមូលនិធិសមធម៌ ម.ស.ស ជាច្រើនរូបទៀតជូនពលដ្ឋក្រីក្រ និងងាយរង​ហានិភ័យ​។ តាមរយៈគោលនយោបាយនេះ បណ្តាពលរដ្ឋបាន​ថ្លែង​អំណរ​គុណដ​ល់​រាជ​រដ្ឋាភិបាល​ដែល​យកចិត្តទុកដាក់អនុវត្តគោលនយោបាយ​នេះ​ដែល​បាន​រួម​ចំណែក​លើក​កម្ពស់​ជីវភាព និងសុខភាពរបស់ពលរដ្ឋ។

ពលរដ្ឋរស់នៅក្រុងតាខ្មៅ ខេត្តកណ្តាល ថ្លែងប្រាប់ BTV នៅថ្ងៃទី២០ខែកុម្ភៈនេះ ថា ការ​ពង្រីក​គោល​នយោបាយ​ផ្តល់បណ្ណ ប.ស.ស និងបណ្ណ ម.ស.ស ជូនពលរដ្ឋបម្រើ​ការងារ​សេដ្ឋកិច្ច​ក្រៅ​ប្រព័ន្ធ និងពលរដ្ឋក្រីក្រ និងពលរដ្ឋងាយរងហានិភ័យនេះ ពិត​ជា​បាន​រួម​ចំណែក​ខ្លាំង​ក្នុង​ការ​ជួយ​សម្រាល​ជីវភាព និងការថែទាំសុខភាព ជាពិសេស នៅពេលពលរដ្ឋ​មាន​ត្រូវ​ការប្រើប្រាស់​សេវា​សុខាភិបាល​ព្យាបាលជំងឺផ្សេងៗ។

ឯកឧត្តម ហេង សុផាន់ណារិទ្ធ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា មក​ដល់​ពាក់​កណ្តាល​ខែ​កុម្ភៈ​ឆ្នាំ២០២៤នេះ ពោលនៅក្នុងរយៈពេល៦ខែ នៃរាជរដ្ឋាភិបាលថ្មីអណត្តិទី៧នេះ មាន​ពលរដ្ឋខ្មែរប្រកបរបរសេដ្ឋកិច្ចក្រៅប្រព័ន្ធ បានចុះបញ្ជីធ្វើបណ្ណបេឡាជាតិសន្តិសុខសង្គម ប.ស.ស មានប្រមាណជាង១៤ម៉ឺន៦ពាន់នាក់ ក្នុងនោះមានបុគ្គលស្វ័យនិយោជន៍ចំនួន ១២ម៉ឺន ៣ ពាន់នាក់ និងអ្នកក្នុងបន្ទុកសមាជិក ប.ស.ស ប្រមាណជាង ២៣០០០ នាក់ទៀត៕ អត្ថបទ៖ ស៊ុម សុខជា