ឧត្ដរមានជ័យ ៖ឯកឧត្ដមនាយឧត្តមសេនីយ៍កិត្តិសង្គហបណ្ឌិត គន់ គីម ប្រធាន​អនុ​គណៈកម្មការ​សាង​សង់​ស្តូបឈ្នះ ឈ្នះ តេជោសែនតំបន់អន្លង់វែង បានឲ្យដឹងថា រយៈពេល២ឆ្នាំ នៃ​ការ​សាងសង់​ស្តូប​អនុស្សាវរីយ៍នយោបាយ ឈ្នះ ឈ្នះ អន្លង់វែងសម្រេចបានជាង៩០ភាគរយ។

ក្នុងពេលចុះពិនិត្យការសាងសង់ស្រូបអនុស្សាវរីយ៍នយោបាយ ឈ្នះ ឈ្នះ អន្លង់វែង នៅថ្ងៃទី២០ ខែកុម្ភៈ ឆ្នាំ២០២៤ ឯកឧត្តម នាយឧត្តមសេនីយ៍ គន់ គីម បានឲ្យដឹងថា គិតត្រឹមពាក់​កណ្តាល​ខែកុម្ភៈ​នេះ​មានរយៈពេល២ឆ្នាំហើយដែលក្រុមការងារ​សម្រេចបានលទ្ធផលជាច្រើនលើការ​សាងសង់​ស្តូប​អនុស្សាវរីយ៍នយោបាយ ឈ្នះ ឈ្នះ។ ឯកឧត្តម នាយឧត្តមសេនីយ៍ បញ្ជាក់ថា ក្នុង​ឆ្នាំ​២០២៤ ក្រុមការងារកំពុងបន្តការឆ្លាក់នៃខ្លឹមសារ និងអត្ថន័យរបស់នយោបាយ ឈ្នះ ឈ្នះ ដែល​កកើតពីការខិតខំតស៊ូរបស់សម្ដេចតេជោ ហ៊ុន សែន ក្នុងការផ្សះផ្សាជាតិបញ្ចប់សង្រ្គាម នាំ​មក​នូវ​សន្ដិភាពពេញលេញសម្រាប់ជាតិកម្ពុជា ក្រោមនយោបាយឈ្នះ-ឈ្នះ ២៩ ធ្នូ ១៩៩៨ ជា​ពិសេស​តំបន់​បញ្ចប់សង្គ្រាមស៊ីវិល នៅអន្លង់វែងនេះជុំវិញស្តូបអនុស្សាវរីយ៍។

ឯកឧត្តម នាយឧត្តមសេនីយ៍ បញ្ជាក់ថា ស្តូបអនុស្សាវរីយ៍នយោបាយ ឈ្នះ ឈ្នះ អន្លង់វែង ជា​ទីតាំង​សំខាន់​ដែល​ត្រូវ​បាន​បញ្ចប់​សង្គ្រាម​ស៊ីវិល​ចុង​ក្រោយ​បង្អស់​ក្រោម​ការ​ដឹកនាំ​ដ៏​ឈ្លាស​វៃ​របស់​សម្តេច​តេជោ ហ៊ុន សែន រហូតធ្វើឲ្យកម្ពុជាមានសន្តិភាពពេញលេញមកដល់ពេលបច្ចុប្បន្ន។

គួររម្លឹកថា កម្ពុជាបានបញ្ចប់សង្រ្គាមទាំងស្រុងនៅថ្ងៃទី ២៩ ខែធ្នូ ឆ្នាំ១៩៩៨ ក្រោម​នយោបាយ​ឈ្នះ ឈ្នះ ដែលដាក់ចេញដោយសម្ដេចតេជោ ហ៊ុន សែន ព្រោះតែ​នយោបាយ​ឈ្នះ ឈ្នះ នេះហើយ ទើបនាំឲ្យកម្ពុជាមានសន្តិភាព ហើយទុកឱកាស​ឲ្យ​ប្រទេសជាតិ​អាច​ធ្វើការ​អភិវឌ្ឍ​នៅ​លើ​គ្រប់​វិស័យ​រហូតមកដល់ពេលនេះ។ ការរំលឹកឡើងវិញអំពីកត្តាប្រវត្តិសាស្រ្ដនេះ ត្រូវបានធ្វើ​ដើម្បី​ជា​ការដឹងគុណចំពោះស្ថាបនិកនយោបាយ ឈ្នះ ឈ្នះ ដើម្បី​ទុក​ជា​ការ​ចងចាំ​អំពី​ការ​ខិតខំ​តស៊ូ​របស់​សម្ដេចតេជោ ហ៊ុន សែន ក្នុងការផ្សះផ្សាជាតិ បញ្ចប់សង្រ្គាមនាំមកនូ​វ​សុខ​សន្ដិភាព​ពេញ​លេញ​សម្រាប់​ជាតិកម្ពុជា៕