អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទថា អ្នកតំណាងអន្តរជាតិបានឈានដល់ការស្របមតិគ្នាជាឯកច្ឆ័ន្ទលើបញ្ហាសំខាន់ៗមួយចំនួន ទាក់ទងទៅនឹងប្រទេសអាហ្វហ្គានីស្ថាន បន្ទាប់ពីកិច្ចប្រជុំរយៈពេលពីរថ្ងៃនៅទីក្រុងដូហា ប៉ុន្តែឧបសគ្គនៅតែមាន។ លោក Guterres បាននិយាយនៅក្នុងសន្និសីទសារព័ត៌មាន បន្ទាប់ពីកិច្ចប្រជុំថា យើងចង់ឱ្យប្រទេសអាហ្វហ្គានីស្ថានមានសន្តិភាព សន្តិភាពជាមួយប្រទេសខ្លួនឯង និងសន្តិភាពជាមួយប្រទេសជិតខាង ហើយអាចទទួលយកការប្តេជ្ញាចិត្ត និងកាតព្វកិច្ចអន្តរជាតិនៃរដ្ឋអធិបតេយ្យមួយ។ ទោះជាយ៉ាងណា លោក Guterres បានបញ្ជាក់ថា ការជម្នះលើឧបសគ្គមួយចំនួននៅតែចាំបាច់ ដើម្បីទម្លាយភាពជាប់គាំងលើបញ្ហាប្រទេសអាហ្វហ្គានីស្ថាន។ លោកបាននិយាយបន្តថា ប្រទេសអាហ្វហ្គានីស្ថាននៅតែជារដ្ឋាភិបាលដែលពុំត្រូវបានគេទទួលស្គាល់ជាអន្តរជាតិ និងក្នុងទិដ្ឋភាពជាច្រើនទៀត ដែលពុំត្រូវបានធ្វើសមាហរណកម្មទៅក្នុងស្ថាប័ននិងសេដ្ឋកិច្ចពិភពលោក។ លោក Guterres និយាយថា មានការយល់ឃើញជាទូទៅរបស់អន្តរជាតិ អំពីការធ្វើឱ្យសិទ្ធិមនុស្សកាន់តែធ្លាក់ចុះខ្លាំង ជាពិសេសចំពោះស្ត្រី និងក្មេងស្រី នៅក្នុងប្រទេសនេះ។ លោក Guterres បានបញ្ជាក់ថា ផែនទីបង្ហាញផ្លូវរួមត្រូវតែត្រូវបានបង្កើតឡើង ដើម្បីដោះស្រាយការព្រួយបារម្ភរបស់សហគមន៍អន្តរជាតិ និងអាជ្ញាធរអាហ្វហ្គានីស្ថាន។ កិច្ចប្រជុំ ដែលដឹកនាំដោយ លោក Guterres ត្រូវបានចូលរួមដោយតំណាងមកពីជាង ២០ ប្រទេស និងអង្គការអន្តរជាតិ រួមមានប្រទេសចិន រុស្ស៊ី និងសហរដ្ឋអាមេរិក។ ក្រុមតាលីបង់ ដែលជាអាជ្ញាធរផ្តាច់ការក្នុងប្រទេសអាហ្វហ្គានីស្ថាន មិនបានមកចូលរួមនោះទេ។ យោងតាមប្រមុខអង្គការសហប្រជាជាតិបានឲ្យដឹងថា លក្ខខណ្ឌជាច្រើនត្រូវបានកំណត់ដោយអាជ្ញាធរតាលីបង់ ដើម្បីមកចូលរួមក្នុងកិច្ចប្រជុំនេះ គឺពុំអាចទទួលយកបាន។

លោក Guterres បាននិយាយថា លក្ខខណ្ឌទាំងនេះ ដំបូងបង្អស់ បានបដិសេធពួកយើងនូវសិទ្ធិក្នុងការនិយាយទៅកាន់អ្នកតំណាងផ្សេងទៀតរបស់សង្គមអាហ្វហ្គានីស្ថាន ហើយបានទាមទារឱ្យមានការអនុវត្តន៍ ដែលមានលក្ខណៈស្រដៀងគ្នាទៅនឹងការទទួលស្គាល់រដ្ឋាភិបាលប្រទេសនេះ។