​វាយកូនបាល់៖ ​ជើងឯក Wimbledon ៨សម័យ Roger Federer បាន​បន្ត​ដំណើរ​ឡើង​វគ្គ ៨នាក់​ចុង​ក្រោយ​ហើយ​នៃ​ការប្រកួត​វាយ​កូន​បាល់ Grand Slam, Wimbledon ស្រប​ពេល​កីឡាករ​លេខ ១ ពិភព​លោក Novak Djokovic ក៏​គ្មាន​បញ្ហា​នៅ​វគ្គ ១៦នាក់​ចុងក្រោយ​ដូចគ្នា​។

​​កីឡាករ​ស្វ៊ី​ស Roger Federer បាន​យកឈ្នះ​គូប្រកួត​មកពី​អ៊ីតាលី Lorenzo Sonego​ លទ្ធផល ៧-៥, ៦-៤ និង ៦-២ ដើម្បី​បន្ត​ដំណើរ​ទៅ​វគ្គ ៨​នាក់​ចុងក្រោយ​ជួប​ជាមួយ​កីឡាករ​រុស្ស៊ី Daniil Medvedev រឺ​កីឡាករ​ប៉ូឡូញ Hubert Hurkacz​ ដែល​ប្រកួត​គ្នា​មិនទាន់​ចប់សព្វគ្រប់​ពោលគឺ Medvedev កំពុង​នាំមុខ ៦-២, ៦-៧(២-៧) ៦-៣ និង ៣-៤ ហើយ​ការប្រកួត​ក៏ត្រូវ​ផ្អាក​ដោយសារ​ភ្លៀង​ធ្លាក់​។​ ​​ងាក​មក​កីឡាករ​លំដាប់​លេខ ១ ពិភពលោក Novak Djokovic បាន​បន្តដំណើរ​ស្វែង​រកពាន Grand Slam លើក​ទី២០ របស់ខ្លួន​ដោយ​យកឈ្នះ​កីឡាករ​ស៊ី​លី Cristian Garin ​លទ្ធផល ៦-២, ៦-៤ និង ៦-២ ដើម្បី​ឡើង​វគ្គ ៨នាក់​ចុងក្រោយ​ជួប​ជាមួយ​កីឡាករ​ហុង​គ្រី Marton Fucsovics ​ដែល​ទើបតែ​យកឈ្នះ​កីឡាករ​រុស្ស៊ី Andrey Rublev​។​

​​កីឡាករ​វ័យ ៣៤ឆ្នាំ Djokovic នៅពេលនេះ​មានមុខ​នៅ​វគ្គ ៨នាក់​ចុងក្រោយ​ក្នុង​ព្រឹត្តិការណ៍ Grand Slam លើក​ទី៥០ ហើយ ខណៈដែល​មានតែ Federer ទេ​ដែល​ធ្វើបាន​ច្រើនជាងគេ​គឺ ៥៨លើក​។ ​​ចំណែក​កីឡាករ​អ៊ីតាលី Matteo Berrettini ​ក៏បាន​កក់​កៅអី​នៅ​វគ្គ ៨​នាក់​ចុងក្រោយ​ផង​ដែរ​ក្នុង​ផ្នែក​បុរស​ បន្ទាប់ពី​យកឈ្នះ​កីឡាករ​បេឡា​រុស Ilya Ivashka ៣​សិត​ផ្ទួនៗ ៦-៤, ៦-៣​ និង ៦-១​។ ​Berrettini ​ដែល​ទើប​ឈ្នះ​ជើងឯក Cinch Championship ខែ​មុននឹង​ត្រូវ​ជួប​ជាមួយ​ជើង​ខ្លាំង​កីឡាករ​អាល្លឺម៉ង់ Alexander Zverev ​រឺ Felix Auger-Aliassime៕

​អត្ថបទ​៖​នាង សុភា​វុ​ធ