តំណាងប៉ាឡេស្ទីន កាលពីថ្ងៃចន្ទ (១៩ កុម្ភៈ) បានស្នើសុំចៅក្រមនៅតុលាការកំពូលរបស់អង្គការសហប្រជាជាតិឱ្យប្រកាសថាការកាន់កាប់ទឹកដីរបស់អ៊ីស្រាអែលជារឿងខុសច្បាប់ ដោយនិយាយថាមតិយោបល់របស់ពួកគេអាចរួមចំណែកដល់ដំណោះស្រាយរដ្ឋពីរ និងសន្តិភាពយូរអង្វែង។

សំណើនេះបានធ្វើឡើងនៅពេលបើកសវនាការរយៈពេលមួយសប្តាហ៍នៅតុលាការយុត្តិធម៌អន្តរជាតិ (ICJ) ក្នុងទីក្រុងឡាអេ ខណៈមហាសន្និបាតអង្គការសហប្រជាជាតិ បានស្វះស្វែងរកការប្រឹក្សា ឬមតិយោបល់ លើការកាន់កាប់នៅឆ្នាំ២០២២ ដែលរដ្ឋជាង ៥០ នឹងបង្ហាញទឡ្ហីករណ៍របស់ពួកគេរហូតដល់ថ្ងៃទី២៦ ខែកុម្ភៈ។

អ៊ីស្រាអែលមិនចូលរួមសវនាការនោះទេ ប៉ុន្តែបានផ្ញើសេចក្តីថ្លែងការណ៍ជាលាយលក្ខណ៍អក្សរចំនួន ៥ ទំព័រ ដែលចេញផ្សាយដោយតុលាការកាលពីថ្ងៃចន្ទ ដែលបាននិយាយថា មតិយោបល់ណាមួយនឹង «បង្កគ្រោះថ្នាក់» ចំពោះការប៉ុនប៉ងដោះស្រាយជម្លោះ ពីព្រោះសំណួរដែលចោទឡើងដោយមហាសន្និបាតអង្គការសហប្រជាជាតិ មិនយុត្តិធម៌នោះទេ។

ការកើនឡើងចុងក្រោយនៃអំពើហឹង្សានៅតំបន់ហ្កាហ្សា ដែលត្រូវបានជំរុញដោយការវាយប្រហារថ្ងៃទី០៧ ខែតុលា នៅអ៊ីស្រាអែល ដោយក្រុមហាម៉ាស បានបង្កការស្មុគស្មាញដល់ភាពសោកសង្រេងដ៏អយុត្តិធម៌ដែលបានចាក់ឫសយ៉ាងជ្រៅរួចហើយនៅមជ្ឈិមបូព៌ា និងធ្វើឱ្យខូចខាតដល់កិច្ចខិតខំប្រឹងប្រែងឆ្ពោះទៅរកផ្លូវទៅកាន់សន្តិភាព៕