មេដឹកនាំស្តាំនិយមជ្រុលរបស់ប្រទេសហូឡង់ លោក ហ្គឺត វីលឌឺស (Geert Wilders) ដែលបានឈ្នះអាសនៈច្រើនជាងគេក្នុងការបោះឆ្នោតកាលពីបីខែមុន ប៉ុន្តែរហូតមកដល់ពេលនេះបរាជ័យក្នុងការបង្កើតរដ្ឋាភិបាលចម្រុះថ្មីមួយ បាននិយាយកាលពីថ្ងៃចន្ទ (១៩ កុម្ភៈ) ថាប្រទេសហូឡង់ គឺជា «មនុស្សល្ងង់របស់អឺរ៉ុប» សម្រាប់ការទទួលយកជនភៀសខ្លួនអ៊ុយក្រែន ច្រើនពេក។

លោក វីលឌឺស ប្រឆាំងនឹងការបន្តជំនួយយោធាដល់អ៊ុយក្រែន ដោយលើកហេតុផលថា ហូឡង់ត្រូវរក្សាអាវុធដើម្បីការពារខ្លួន។ ការប្រឆាំងនេះ គឺជាបញ្ហាមួយក្នុងចំណោមបញ្ហាជាច្រើនដែលបង្កការខ្វែងគំនិតក្នុងគណបក្សសេរីភាពស្តាំនិយមជ្រុល (PVV) របស់លោក ពីការស្វែងរកដៃគូបង្កើតរដ្ឋាភិបាលចម្រុះ។

នាយករដ្ឋមន្ត្រីផុតអាណត្តិលោក ម៉ាក រ៉ូតេ (Mark Rutte) បាននិយាយនៅចុងសប្តាហ៍នេះថា ការគាំទ្ររបស់ហូឡង់ សម្រាប់អ៊ុយក្រែន ត្រូវបានធានាសម្រាប់រយៈពេលវែង ដោយសារតែលោក វីលឌឺស នឹងមិនអាចស្វែងរកដៃគូចម្រុះណាមួយដែលគាំទ្រគោលបំណងរបស់លោកក្នុងការកាត់ផ្ដាច់ជំនួយយោធាអ៊ុយក្រែនបានទេ។

ចាប់តាំងពីការចាប់ផ្តើមនៃការលុកលុយរបស់រុស្ស៊ី លើអ៊ុយក្រែន ជិតពីរឆ្នាំមុនមក ជនភៀសខ្លួនជាង ១០០.០០០ នាក់ពីអ៊ុយក្រែនបានចូលទៅក្នុងប្រទេសហូឡង់។ ក្រោមយន្តការការពារបណ្តោះអាសន្នរបស់សហភាពអឺរ៉ុប ជនភៀសខ្លួនអ៊ុយក្រែនមានសិទ្ធិធ្វើដំណើរឆ្លងកាត់សហភាពអឺរ៉ុប ដើម្បីរស់នៅ និងធ្វើការក្នុងរដ្ឋសមាជិកណាមួយរហូតដល់យ៉ាងហោចណាស់ខែមីនា ឆ្នាំ២០២៥៕