សារព័ត៌មានក្នុងស្រុក អាល់ អាកបា (al-Akhbar) បានរាយការណ៍កាលពីថ្ងៃចន្ទ (១៩ កុម្ភៈ) ថាការស្ទង់មតិមួយបានបង្ហាញថាចំនួន ៩០ ភាគរយនៃប្រជាជនលីបង់ ចាត់ទុកថាសហរដ្ឋអាមេរិក ជាអ្នកទទួលខុសត្រូវចំពោះការវាយប្រហារជាបន្តបន្ទាប់របស់អ៊ីស្រាអែល លើប្រទេសលីបង់ និងតំបន់ហ្កាហ្សាស្ទ្រីប។

ដោយដកស្រង់ការស្ទង់មតិដែលធ្វើឡើងដោយមជ្ឈមណ្ឌលប្រឹក្សាសម្រាប់ការសិក្សា និងឯកសារ ដែលជាស្ថាប័នស្រាវជ្រាវមានមូលដ្ឋាននៅទីក្រុងបេរូត ស្តីពីការសិក្សាយុទ្ធសាស្ត្រ និងការអភិវឌ្ឍន៍ សារព័ត៌មានក្នុងស្រុកនេះបាននិយាយថា នៅទូទាំងគ្រប់វិស័យនៃប្រទេសលីបង់ បានបង្ហាញថាអ្នកឆ្លើយតបចំនួនជាង ៩០ ភាគរយបានយល់ស្របថា «សហរដ្ឋអាមេរិកគឺជាហេតុផលចម្បង នៅពីក្រោយការកើនឡើងនៃការប្រយុទ្ធជាបន្តបន្ទាប់ និងការបរាជ័យក្នុងការបញ្ចប់ការឈ្លានពានរបស់អ៊ីស្រាអែល»។

ព្រំដែនលីបង់-អ៊ីស្រាអែល បាននិងកំពុងឃើញភាពតានតឹងកាន់តែខ្លាំងឡើង ចាប់តាំងពីថ្ងៃទី០៨ ខែតុលា ឆ្នាំ២០២៣ បន្ទាប់ពីក្រុមប្រដាប់អាវុធលីបង់ ហេសបូឡា (Hezbollah) បានបាញ់រ៉ូកែតរាប់សិបគ្រាប់ឆ្ពោះទៅកាន់អ៊ីស្រាអែល ដើម្បីគាំទ្រការវាយប្រហាររបស់ពួកហាម៉ាស លើរដ្ឋជ្វីហ្វមួយនេះ កាលពីមួយថ្ងៃមុននោះ ដែលជំរុញឱ្យអ៊ីស្រាអែល ឆ្លើយតបដោយការបាញ់កាំភ្លើងធំទៅកាន់ភាគអាគ្នេយ៍លីបង់៕