ប្រធានគណៈកម្មការអឺរ៉ុប លោកស្រី អឺស៊ុឡា វ៉ុនដឺ ឡេយ៉េន (Ursula von der Leyen) កាលពីថ្ងៃចន្ទ (១៩ កុម្ភៈ) បានប្តេជ្ញាការពារលទ្ធិប្រជាធិបតេយ្យពីអ្នកដែលព្យាយាមបំផ្លាញ ខណៈដែលលោកស្រីបានទទួលការគាំទ្រពីក្រុមអភិរក្សនិយមអាល្លឺម៉ង់ សម្រាប់អាណត្តិប្រាំឆ្នាំទៀត ក្នុងការគ្រប់គ្រងស្ថាប័នប្រតិបត្តិរបស់សហភាពអឺរ៉ុបមួយនេះ។

នៅក្នុងកិច្ចប្រជុំថ្នាក់ដឹកនាំ គណបក្សប្រឆាំង ប្រជាធិបតេយ្យគ្រិស្ត (CDU) របស់ប្រទេសអាល្លឺម៉ង់ បានផ្តល់ការគាំទ្រដល់លោកស្រី វ៉ុនដឺ ឡេយ៉េន ដែលជាអតីតរដ្ឋមន្ត្រីការពារជាតិអាល្លឺម៉ង់វ័យ ៦៥ ឆ្នាំ ដើម្បីធ្វើជាបេក្ខភាពសម្រាប់តំណែងជាប្រធានគណៈកម្មការ ដោយធ្វើឱ្យលោកស្រីឈរលើទីតាំងដ៏រឹងមាំដើម្បីរក្សាតំណែង។

លោកស្រី វ៉ុនដឺ ឡេយ៉េន បាននិយាយថា យុទ្ធនាការបោះឆ្នោតរបស់ខ្លួនចង់បញ្ជាក់យ៉ាងច្បាស់ដល់លោកប្រធានាធិបតីរុស្ស៊ី វ្ល៉ាឌីមៀ ពូទីន និងគណបក្សស្តាំនិយមជ្រុលនៅអឺរ៉ុបថា «លទ្ធិប្រជាធិបតេយ្យនៅអឺរ៉ុបគឺនៅបន្តរៀងរហូត»។

ប្រធានគណៈកម្មការអឺរ៉ុបរូបនេះនឹងចាប់ផ្តើមតំណែងអាណត្តិទីពីរ ស្របពេលដែលអឺរ៉ុបស្វះស្វែងរកការពង្រឹងសន្តិសុខ ដោយសាររុស្ស៊ីធ្វើសង្រ្គាមនៅតាមព្រំដែនរបស់ខ្លួន និងឱកាសដែលអតីតប្រធានាធិបតីអាមេរិក ដូណាល់ ត្រាំ (Donald Trump) ត្រលប់ទៅសេតវិមានវិញ ព្រមទាំងបក្សស្ដាំនិយមជ្រុលកំពុងទទួលបានប្រជាប្រិយភាព៕