សហរដ្ឋអាមេរិក និងហ្វីលីពីន បានធ្វើការល្បាតដែនអាកាសរួមគ្នាលើតំបន់ដែលប្រឈមនឹងជម្លោះនៅសមុទ្រចិនខាងត្បូង ដែលជាការបង្ហាញមួយផ្សេងទៀតនៃសម្ព័ន្ធភាពការពារជាតិដ៏រឹងមាំ តែការល្បាតនេះបាននាំឲ្យមានការរិះគន់ពីប្រទេសចិន ខណៈដែលភាពតានតឹងក្នុងដែនសមុទ្រនេះ នៅតែបន្តមាន។

តាមរយៈការបង្ហោះ នៅលើបណ្ដាញសង្គម Facebook កងទ័ពអាកាសហ្វីលីពីន បានឲ្យដឹងថា ខ្លួនបានធ្វើការល្បាតជាមួយកងកម្លាំងអាកាសប៉ាស៊ីហ្វិករបស់សហរដ្ឋអាមេរិក កាលពីថ្ងៃចន្ទ (ទី១៩ ខែកុម្ភៈ) នៅប៉ែកខាងលិចនៃកោះសំខាន់ៗរបស់ប្រទេសអាស៊ីអាគ្នេយ៍មួយនេះ។

កងទ័ពអាកាសហ្វីលីពីនបានប្រាប់នៅក្នុងការបង្ហោះនោះថា «សកម្មភាពសហប្រតិបត្តិការនេះមានគោលបំណងជំរុញកិច្ចសហប្រតិបត្តិការ រវាងកងកម្លាំងប្រដាប់អាវុធនៃប្រទេសហ្វីលីពីន និងសមភាគីអាមេរិករបស់ខ្លួន» ដែលមានរួមបញ្ចូលផងដែរនូវរូបថត និងវីដេអូនៃការល្បាតរួមគ្នានេះ។

ក្នុងសេចក្តីថ្លែងការណ៍មួយនៅលើគេហទំព័រមីក្រូប្លុករបស់ចិន គឺ Weibo បញ្ជាការចម្រុះភាគខាងត្បូងរបស់យោធាចិន បានពណ៌នាការល្បាតដែនអាកាសនេះថា ជាការសម្ដែងកិច្ចកលសាធារណៈ ហើយបានចោទប្រកាន់ហ្វីលីពីនថា បានរំខានដល់សណ្តាប់ធ្នាប់ នៅសមុទ្រចិនខាងត្បូង ដោយការចូលរួមជាមួយកងកម្លាំងពីប្រទេសក្រៅតំបន់។ ជាមួយគ្នានេះ ចិនក៏បានលើកឡើងផងដែរថា កងទ័ពរបស់ខ្លួននឹងបន្តរក្សាការប្រុងប្រយ័ត្នខ្ពស់ និងការពារអធិបតេយ្យភាពជាតិយ៉ាងម៉ឺងម៉ាត់។

គួរបញ្ជាក់ដែរថា កាលពីថ្មីៗនេះ ទីក្រុងវ៉ាស៊ីនតោន និងទីក្រុងម៉ានីល ក៏បានធ្វើការល្បាតដែនសមុទ្រផងដែរ នៅក្នុងតំបន់មានជម្លោះ៕