លោករដ្ឋមន្ត្រីការពារជាតិលោក ប៊ីល ប្លែរ (Bill Blair) បានប្រកាសកាលពីថ្ងៃចន្ទថា ប្រទេសកាណាដាកំពុងផ្តល់ជំនួយយានដ្រូនរាប់រយគ្រឿងដល់អ៊ុយក្រែន ខណៈដែលការតស៊ូរបស់ខ្លួន ដើម្បីកម្ចាត់ការឈ្លានពានដែលមិនបង្កហេតុរបស់រុស្ស៊ី ជិតដល់ខួបលើកទី២ របស់ខ្លួនហើយ។

ការផ្តល់ជំនួយនេះ រួមមានប្រព័ន្ធការពារដែនអាកាសគ្មានមនុស្សបើក SkyRanger R70 ចំនួន ៨០០គ្រឿង ដែលមានតម្លៃជាង ៧០លានដុល្លារ ដែលលោកប៊ែ្លរ បាននិយាយថា នឹងជួយអ៊ុយក្រែន «នៅពេលខ្លួនប្រយុទ្ធយ៉ាងអង់អាច ដើម្បីការពារខ្លួន»ប្រឆាំងនឹងការឈ្លានពានរបស់រុស្ស៊ី។

លោកបាននិយាយនៅក្នុងសេចក្តីថ្លែងការណ៍មួយថា៖« នៅពេលដែលយើង ខិតជិតដល់ខួបលើកទី២ នៃការឈ្លានពានដោយខុសច្បាប់របស់រុស្ស៊ី ប្រទេសកាណាដា ឈរយ៉ាងរឹងមាំជាមួយអ៊ុយក្រែន ក្នុងការការពារសេរីភាព និងលទ្ធិប្រជាធិបតេយ្យ»។ «ក្នុងការសម្របសម្រួលជាមួយសម្ព័ន្ធមិត្ត និងដៃគូរបស់យើង យើងនឹងបន្តផ្តល់ជំនួយយោធាដល់អ៊ុយក្រែន ដែលខ្លួនត្រូវការ ដើម្បីប្រយុទ្ធនិងឈ្នះសង្រ្គាមនេះ»។

សេចក្តីប្រកាសកាលពីថ្ងៃចន្ទ គឺមានបំណងផ្តល់ឲ្យអ៊ុយក្រែននូវ«យានដ្រូនដែលខ្លួនត្រូវការ» ដើម្បីស្វែងរក និងកំណត់អត្តសញ្ញាណគោលដៅរបស់រុស្ស៊ី ដោយលោកបានបន្ថែមថា «កាណាដា នឹងឈរជាមួយអ៊ុយក្រែនឲ្យបានយូរ តាមដែលប្រទេសនេះ ត្រូវការ»។