អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទថា កងរក្សាសន្តិសភាពអង្គការសហប្រជាជាតិ នៅសាធារណរដ្ឋប្រជាធិបតេយ្យកុងហ្គោភាគខាងកើត កំពុងដាក់ពង្រាយកម្លាំងឡើងវិញដើម្បីជួយការពារទីក្រុង Goma និងទីក្រុង សាកេ(Sake)។ លោក Stephane Dujarric ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា កងកម្លាំងរក្សាសន្តិភាព មកពីបេសកកម្មនេះ កំពុងព្រួយបារម្ភយ៉ាងខ្លាំង ដោយសារការកើនឡើងជម្លោះថ្មី នៅខេត្ត ណស្ស គីវូ (North Kivu) ។

លោក Dujarric និយាយថា ដោយសារស្ថានភាពសន្តិសុខកំពុងធ្លាក់ចុះខ្លាំង នៅជុំវិញទីក្រុងSake និងទីក្រុង Goma បេសកកម្មនេះ កំពុងបន្ថែមកម្លាំងទៅទីនោះ ដោយនាំមកកងកម្លាំងរក្សាសន្តិភាព មកពីកងពលអន្តរាគមន៍កងកម្លាំងរបស់ខ្លួនមានមូលដ្ឋាននៅក្នុងទីក្រុង Beni នៅផ្នែកភាគខាងជើងនៃខេត្តណស្ស គីវូ។ កងរក្សាសន្តិភាព បានបញ្ជាក់ជាថ្មី នូវការអំពាវនាវដល់ក្រុមឧទ្ទាម M23 ដើម្បីបញ្ឈប់ការវាយលុករបស់ខ្លួន និងគោរពផែនទីបង្ហាញផ្លូវ Luanda។

អ្នកនាំពាក្យបេសកកម្មអង្គការសហប្រជាជាតិ និយាយថា សមាជិកបេសកកម្ម បានជួបជាមួយអ្នកសម្របសម្រួលកងទ័ពកុងហ្គោ ក្នុងខេត្ត North Kivu កាលពីចុងសប្តាហ៍សម្រាប់សកម្មភាពយោធារួម ក្នុងការការពារទីក្រុង Sake និងទីក្រុង Goma។ បេសកកម្មរក្សាសន្តិភាពអង្គការសហប្រជាជាតិ បានបង្ហាញការព្រួយបារម្ភ ជុំវិញយុទ្ធនាការព័ត៌មានក្លែងក្លាយ ដាក់គោលដៅលើកងកម្លាំងរក្សាសន្តិភាព ដែលកំពុងរារាំងកិច្ចប្រឹងប្រែងដើម្បីអនុវត្តកាតព្វកិច្ចរបស់ខ្លួន នៅក្នុងសាធារណរដ្ឋប្រជាធិបតេយ្យកុងហ្គោ។