បេក្ខជន ២រូបដែលរងបរាជ័យនៅក្នុងការបោះឆ្នោតប្រធានាធិបតីឥណ្ឌូនេស៊ី កាលពីសប្តាហ៍មុន បានជំរុញឲ្យសភាពិនិត្យមើលការតវ៉ាអំពីភាពមិនប្រក្រតី ក្នុងដំណើរការនៅមុនព្រឹត្តិការណ៍នេះ។ ការអំពាវនាវនេះត្រូវបានធ្វើឡើង បើទោះបីជាមានការអត្ថាធិប្បាយពីអ្នកសង្កេតការណ៍ឯករាជ្យថា មិនមានសញ្ញានៃការក្លែងបន្លំជាប្រព័ន្ធនៅក្នុងការបោះឆ្នោតដ៏ធំបំផុតរបស់ពិភពលោក ដែលមានរយៈពេលតែ ១ថ្ងៃនេះនោះទេ លើកលែងតែបញ្ហាតិចតួច ដូចជាបញ្ជីឈ្មោះបោះឆ្នោតហួសសម័យ ឬការពន្យារពេលបោះឆ្នោតប៉ុណ្ណោះ។

ដោយលទ្ធផលផ្លូវការគ្រោងនឹងចេញនៅថ្ងៃទី២០ ខែមីនានោះ ការរាប់សន្លឹកឆ្នោតមិនផ្លូវការ បង្ហាញថា រដ្ឋមន្ត្រីការពារជាតិ លោក Prabowo Subianto បានឈ្នះការប្រកួតប្រជែងក្នុងការបោះឆ្នោតត្រឹមតែ ១ជុំ ដោយមានសំឡេងគាំទ្រប្រហែល ៥៨%។ ចំណែកគូប្រជែងរបស់លោក គឺលោក Anies Baswedan និងលោក Ganjar Pranowo ត្រូវបានព្យាករថា នឹងទទួលបានសន្លឹកឆ្នោត ២៥% និង ១៧%រៀងៗខ្លួន។ ហើយការរាប់សន្លឹកឆ្នោតបឋមរបស់អាជ្ញាធររៀបចំការបោះឆ្នោត ក៏បានបង្ហាញពីលំដាប់ថ្នាក់ស្រដៀងគ្នានេះដែរ។

តែដោយគ្មានការផ្តល់ភ័ស្តុតាងអ្វីជាក់លាក់ គណបក្សចាញ់ឆ្នោតទាំង២ បានតវ៉ាថា មានការបំភិតបំភ័យចំពោះអ្នកបោះឆ្នោត ការរៀបចំចាត់ចែងពីស្ថាប័នរដ្ឋ និងការប្រើប្រាស់ធនធានរដ្ឋមិនត្រឹមត្រូវ ដូចជាមូលនិធិសុខុមាលភាព អំឡុងធ្វើយុទ្ធនាការឃោសនាបោះឆ្នោត ដើម្បីមានឥទ្ធិពលលើលទ្ធផលបោះឆ្នោត។

កាលពីថ្ងៃចន្ទ (ទី១៩ ខែកុម្ភៈ) លោក Ganjar បានជំរុញឲ្យមានការស៊ើបអង្កេត នៅពេលសភាកោះប្រជុំឡើងវិញ នៅថ្ងៃទី៥ ខែមីនា។ លោកបានថ្លែងថា៖ «រឿងបែបនេះត្រូវតែស៊ើបអង្កេត។ យ៉ាងកម្សោយបំផុត សភាគួរតែបើកសវនាការដែរ»។

ចំណែកលោក Anies ជាអតីតអភិបាលរដ្ឋធានីហ្សាការតា បាននិយាយនៅថ្ងៃអង្គារនេះថា គណបក្សរបស់លោក «ត្រៀមខ្លួនជាស្រេចដើម្បីចូលរួម» ក្នុងការស៊ើបអង្កេតរបស់សភា ព្រោះការធ្វើបែបនេះអនុញ្ញាតឲ្យសមាជិកសភាស៊ើបអង្កេតសកម្មភាពរបស់រដ្ឋាភិបាល។

តែយ៉ាងក្ដី លោក Arya Fernandes មកពីមជ្ឈមណ្ឌល ដើម្បីការសិក្សាយុទ្ធសាស្ត្រ និងអន្តរជាតិរបស់ប្រទេសឥណ្ឌូនេស៊ី បាននិយាយថា វាពិបាកនឹងចាប់ផ្ដើមការស៊ើបអង្កេតណាស់ ព្រោះការធ្វើបែបនោះត្រូវការការគាំទ្រពីសមាជិកសភា ដោយលោកបន្ថែមថា បើទោះជាកើតឡើងមែន ក៏លទ្ធផលនឹងមិនអាចលុចោលបានដែរ៕