​វាយកូនបាល់៖ ​កីឡាការិនី​វាយ​កូន​បាល់​ទុយ​នេ​ស៊ី Ons Jabeur​ បាន​ក្លាយជា​កីឡាការិនី​មកពី​តំបន់​អារ៉ាប់​ដំបូង​គេ​ដែល​ឡើង​វគ្គ ៨នាក់​ចុងក្រោយ​ព្រឹត្តិការណ៍ Grand Slam, Wimbledon បន្ទាប់ពី​យកឈ្នះ​កីឡាការិនី​ប៉ូឡូញ Iga Swiatek​។

​​កីឡាការិនី​វ័យ ២៦ឆ្នាំ OnsJabeur​ ថ្វីបើ​ចាញ់​សិត​ដំបូង ៥-៧ តែ​កីឡាការិនី​លំដាប់​លេខ ២៤ពិភព​លោក​រូបនេះ​បាន​វាយបក​យកឈ្នះ​វិញ​ ២​សិត​ផ្ទួនៗ ៦-១ និង ៦-១ ទំលាក់​ជើងឯក French Open, Iga Swiatek​ ត្រឹម​វគ្គ ១៦​នាក់​ចុង​ក្រោយនេះ​។ ​ជុំ​បន្ត Ons Jabeur​ នឹង​ត្រូវ​ជួប​ជាមួយ​កីឡា​ការិនី​បេឡា​រុស Aryna Sabalenka​ ដែល​បាន​យកឈ្នះ​កីឡាការិនី​កា​ហ្សា​ក់​ស្ថាន Elena Rybakina​។ ​Aryna Sabalenka​ បច្ចុប្បន្ន​ឈរ​លេខ ៤ ពិភពលោក​បាន​យកឈ្នះ Rybakina​ លទ្ធផល ៦-៣, ៤-៦ និង ៦-៣​។ ​​ចំណែកឯ​កីឡាការិនី​វ័យក្មេង​អង់គ្លេស Emma Raducanu​ ដែល​ធ្វើអោយ​គ្រប់គ្នា​ភ្ញាក់ផ្អើល​ក្នុងនាម​ជា​កីឡាការិនី​វ័យ​ត្រឹម ១៨ឆ្នាំ​អង់គ្លេស​ដែល​បង្ហាញខ្លួន​លើកដំបូង​នៅ Grand Slam និង​ឈាន​ឡើងដល់​វគ្គ ១៦នាក់​ចុងក្រោយ​នោះបានបញ្ចប់​ត្រឹម​ការខកចិត្ត​ប៉ុណ្ណោះ​។

​​កីឡាការិនី​វ័យ ១៨ឆ្នាំ​រូបនេះ​ ខណៈពេលដែល​គូប្រកួត​របស់​នាង Ajla Tomljanovic​ កំពុង​នាំមុខ ៤-៦ និង ០-៣ នោះក៏បាន​ហៅ​ក្រុមការងារ​របស់​នាង ​បន្ទាប់ពី​មាន​អាការៈពិបាក​ដកដង្ហើមរហូត​បង្ខំចិត្ត​ដកខ្លួន​ចេញពី​ការប្រកួត​ត្រឹមនេះ​។ ​សូមបញ្ជាក់ថា Emma Raducanu​ បច្ចុប្បន្ន​ឈរ​ចំណាត់ថ្នាក់​លេខ ៣៣៨ ពិភពលោក​ហើយ​បានមក​លេង​នៅ Wimbledon នេះ​ដោយ​ឆ្លងកាត់​វគ្គ​ជំ​រុះ​ផងដែរ​។ ​គូប្រកួត​របស់​នាង Ajla Tomljanovic​ នឹងត្រូវ​ឡើង​វគ្គ ៨នាក់​ចុងក្រោយ​ ដោយ​នឹងត្រូវ​ជួប​ជាមួយ​មិត្ត​រួម​ជាតិ​អូស្ត្រាលី​លំដាប់​លេខ ១ ពិភពលោក Ashleigh Barty៕

​អត្ថបទ​៖​នាង សុភា​វុ​ធ