អង្គការសុខភាពពិភពលោក (WHO) នៅថ្ងៃអង្គារ (ទី២០ ខែកុម្ភៈ) នេះ បានប្រាប់ឲ្យដឹងថា ខ្លួនបានបញ្ចប់បេសកកម្មជម្លៀសលើកទី២ នៅមន្ទីរពេទ្យ Nasser របស់តំបន់ហ្កាហ្សា ដោយបានផ្ទេរអ្នកជំងឺក្នុងស្ថានភាពធ្ងន់ធ្ងរសរុបចំនួន ៣២នាក់ដែលរួមមានទាំងកុមារផងដែរ ចេញពីទីកន្លែង ដែលត្រូវបានរំខានដោយការប្រយុទ្ធគ្នា។

ទីភ្នាក់ងារអង្គការសហប្រជាជាតិ (UN) បាននិយាយថា មន្ទីរពេទ្យ Nasser នៅទីក្រុង Khan Younis ដែលជាមន្ទីរពេទ្យធំទី២ របស់តំបន់ហ្កាហ្សានោះ បានឈប់ដំណើរការកាលពីសប្តាហ៍មុន បន្ទាប់ពីមានការឡោមព័ទ្ធអស់រយៈពេល ២សប្តាហ៍ ហើយបន្ទាប់មកបន្តដោយការវាយឆ្មក់។

បុគ្គលិករបស់ WHO បាននិយាយថា ការបំផ្លិចបំផ្លាញជុំវិញមន្ទីរពេទ្យ គឺជារឿង «មិនអាចពិពណ៌នាបាននោះទេ» ហើយបានបង្ហាញពីការព្រួយបារម្ភ ចំពោះអ្នកជំងឺដែលឈឺ និងរងរបួសប្រមាណ ១៣០នាក់ និងគ្រូពេទ្យចំនួន ១៥នាក់ដែលនៅតែស្ថិតក្នុងទីតាំងនោះដដែល។

អ្នកនាំពាក្យរបស់ WHO លោក Tarik Jasarevic បាននិយាយថា កិច្ចប្រឹងប្រែង ដើម្បីផ្ទេរអ្នកជំងឺដែលនៅសល់ កំពុងបន្តធ្វើ ដោយបានបញ្ជាក់បន្ថែមថា ទីតាំងនេះមិនមានអគ្គិសនី ឬទឹកប្រើប្រាស់នោះឡើយ ហើយកាកសំណល់វេជ្ជសាស្រ្ត និងសំរាមកំពុង «បង្កើតបានជាកន្លែងសម្រាប់មេរោគដែលបង្កឲ្យមានជំងឺផ្សេងៗ»៕