នៅក្នុងរយៈពេល ៦ ខែនៃឆ្នាំ២០២១ នេះ ចំនួនគ្រោះថ្នាក់ពីហេតុការណ៍រន្ទះបាញ់បានកើតឡើងដល់ ៧០ ករណី។ នេះបើតាមឯកឧត្ដម សុទ្ធ គឹមកុលមុនី ទីប្រឹក្សា និងជាអ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្តរាយ បានថ្លែងឱ្យ BTV ដឹងនៅយប់ថ្ងៃទី៦ ខែកក្កដា។ ឯកឧត្ដមបន្តថា ករណី គ្រោះថ្នាក់ពីហេតុការណ៍រន្ទះបាញ់នេះ កាលពីឆ្នាំ២០២០ ក្នុងរយៈពេលដូចគ្នា គឺកើតមានតែជាង ៦០ ករណីប៉ុណ្ណោះ។

ឯកឧត្ដមបន្ថែមថា ចំពោះគ្រោះមហន្តរាយដែលកើតមានមកពីករណីភ្លើងឆេះ និងខ្យល់កន្ត្រាក់នៅក្នុង ឆ្នាំនេះវិញ បានថយចុះគួរឱ្យកត់សម្គាល់។

របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងបន្ថែមថា បាត់ដំបងជា តំបន់ដែលមានអ្នកស្លាប់ដោយបាតុភូតរន្ទះច្រើនជាងគេ គឺមានរហូតដល់ ១៤ នាក់ ក្នុងចំណោម ករណីដែលបានកើតឡើងចំនួន ១៥ លើក៕ អត្ថបទ៖ គង់ ឌិន