លោកប្រធានាធិបតី ចូ បៃដិន (Joe Biden) បាននិយាយកាលពីថ្ងៃអង្គារ (២០ កុម្ភៈ) ថាសហរដ្ឋអាមេរិក នឹងប្រកាសកញ្ចប់ទណ្ឌកម្មដ៏ធំមួយប្រឆាំងនឹងប្រទេសរុស្ស៊ី នៅថ្ងៃសុក្រ (២៣ កុម្ភៈ) ខាងមុខនេះជុំវិញការស្លាប់របស់មេដឹកនាំបក្សប្រឆាំង លោក អាឡិចស៊ី ណាវ៉ាលនី (Alexei Navalny) និងសង្រ្គាមអ៊ុយក្រែនរយៈពេលពីរឆ្នាំ។

លោក បៃដិន បាននិយាយបែបនេះទៅកាន់អ្នកសារព័ត៌មាននៅពេលលោកចេញដំណើរទៅរដ្ឋកាលីហ្វ័រនីញ៉ា ប៉ុន្តែមិនបានផ្តល់ព័ត៌មានលម្អិតលើទណ្ឌកម្មនោះទេ។

ទីប្រឹក្សាសន្តិសុខជាតិរបស់សេតវិមានលោក ជេក ស៊ូលីវ៉ាន់ (Jake Sullivan) បាននិយាយថា ការដាក់ទណ្ឌកម្មចុងក្រោយបំផុតលើរុស្ស៊ី នេះនឹងកំណត់គោលដៅជាច្រើន រួមទាំងមូលដ្ឋានការពារជាតិ និងឧស្សាហកម្មរបស់ប្រទេស រួមជាមួយនឹងប្រភពចំណូលសម្រាប់សេដ្ឋកិច្ច។

អ្នកនាំពាក្យសន្តិសុខជាតិរបស់សេតវិមានលោក ចន ឃឺបប៊ី (John Kirby) បាននិយាយថា កញ្ចប់ទណ្ឌកម្មនេះនឹង «ដាក់ឱ្យរុស្ស៊ី ទទួលខុសត្រូវចំពោះអ្វីដែលបានកើតឡើងចំពោះលោក ណាវ៉ាលនី» និងសម្រាប់សកម្មភាពរបស់ខ្លួនក្នុងអំឡុងពេលនៃសង្រ្គាមនៅប្រទេសអ៊ុយក្រែន៕