នៅថ្ងៃទី ២១ ខែកុម្ភៈ ឆ្នាំ២០២៤នេះ គឺជាថ្ងៃទិវាជាតិសុខភាពមាតា ទារក និងកុមារ ហើយតាមរយៈទិវានេះ ស្ត្រីជាម្តាយបានថ្លែងអំណរគុណរាជរដ្ឋាភិបាល ដែលបានអនុវត្តគោលនយោបាយផ្តល់សេវាគាំពារសង្គម និងធ្វើឲ្យស្រ្តីជាម្តាយទទួលបានអត្ថប្រយោជន៍ជាច្រើនពីរាជរដ្ឋាភិបាល អាណត្តិទី៧ លើការថែទាំសុខភាព លើកកម្ពស់សុខភាពមាតា ទារក និងកុមារឱ្យមានសុខភាពល្អប្រសើរ។
ស្ត្រីជាម្តាយ បានថ្លែងប្រាប់ BTV នៅថ្ងៃទី២១ ខែកុម្ភៈនេះថា បច្ចុប្បន្នពួកគេដែលបម្រើការងារនៅក្នុងសេដ្ឋកិច្ចទំាងក្នុងប្រព័ន្ធ និងក្រៅប្រព័ន្ធ បានប្រើប្រាស់បណ្ណបេឡាជាតិសន្តិសុខសង្គម ប.ស.ស និងបណ្ណមូលនិធិសមធម៌។ ចំណែកស្ត្រីជាម្តាយផ្សេងទៀត ស្ថិតក្នុងបន្ទុកគ្រួសារងាយរងហានិភ័យ និងគ្រួសារក្រីក្រជាដើបានទទួលអត្ថប្រយោជន៍ជាច្រើនពីរាជរដ្ឋាភិបាល ពិសេសការទទួលបានថវិកាឧបត្ថម្ភថែទាំសុខភាពនាអំឡុងពេលមានផ្ទៃពោះ ពេលសម្រាល ក្រោយពេលសម្រាល និងការថែទាំសុខភាពកុមារក្រោយពេលសម្រាលរយៈពេល២ឆ្នាំ ដែលការអនុវត្តគោលនយោបាយនេះ គឺលើកកម្ពស់សុខភាពម្តាយ ទារក និងកុមារឲ្យមានភាពល្អប្រសើរឡើង។
នៅក្នុងឱកាសទិវាជាតិសុខភាពមាតា ទារក និងកុមារ ២១ កុម្ភៈ នេះដែរ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្ញើរសារ អំពាវនាវចំពោះបងប្អូនជនរួមជាតិ ជាពិសេសបុរស និងស្ត្រីជាមាតាបិតា ដែលជាស្ត្រីមានផ្ទៃពោះទៅពិនិត្យសុខភាពយ៉ាងតិច៤ដង តាមពេលវេលាកំណត់ ដើម្បីទទួលវ៉ាក់សាំងបង្ការជំងឺ និងការចម្លងមេរោគពីម្ដាយទៅកូន ជាពិសេសការស្ម័គ្រចិត្តធ្វើតេស្តឈាមរកមេរោគអេដស៍ស្វាយ និងរលាកថ្លើមប្រភេទបេ និងទៅសម្រាលកូននៅមណ្ឌលសុខភាព ឬមន្ទីរពេទ្យដែលមានគ្រូពេទ្យជំនាញ ទទួលបានការបណ្ដុះបណ្ដាលត្រឹមត្រូវ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
