កំពង់ឆ្នាំង៖ នៅថ្ងៃទី២១ ខែកុម្ភៈ ឆ្នាំ២០២៤នេះ ឯកឧត្តម ហេង រតនា អគ្គនាយកស៊ីម៉ាក់ បានថ្លែងអោយដឹងថា បញ្ហាគ្រាប់មីន និងសំណល់យុទ្ធភណ្ឌសង្រ្គាមនៅកម្ពុជា មានប្រមាណជាង៤.៣លានតោន ដែលមាន៥៣៩.២៨១ជើងហោះហើរ ទម្លាក់នៅលើ១២៥.៦៩៨ទីតាំង ក្នុងនោះមានគ្រាប់បែកចង្កោមប្រមាណ៣០លានកូនគ្រាប់ និងសំណល់អាវុធគីមីមួយចំនួនផងដែរ។ ឯកឧត្តមបានថ្លែងបែបនេះក្នុងពិធីបិទវគ្គហ្វឹកហ្វឺនរំលឹកជំនាញស្រាវជ្រាវគ្រាប់ទម្លាក់ និងគ្រាប់បែកចង្កោម នៅវិទ្យាស្ថានបច្ចេកទេសសកម្មភាពកំចាត់មីនកំពង់ឆ្នាំង ដើម្បីអោយប្អូនៗជាសិក្ខាកាមបានយល់ដឹងពីចំនួនគ្រាប់មីន និងសំណល់យុទ្ធភណ្ឌសង្រ្គាមនៅកម្ពុជា មានប៉ុន្មាន។

ឯកឧត្តម ហេង រតនា បានថ្លែងបន្តថា៖ បញ្ហាគ្រាប់មីន និងសំណល់យុទ្ធភណ្ឌសង្រ្គាមនៅកម្ពុជា ដែលបានបន្សល់ទុកពីសង្រ្គាមស៊ីវិលក្នុងប្រទេស និងការឈ្លានពានពីខាងក្រៅមានចំនួនរាប់លានគ្រាប់នៅក្នុងដី និងនៅក្រោមទឹក ក្នុងនោះមានគ្រាប់បែកទម្លាក់ពីយន្តហោះមានប្រមាណជាង៤.៣លានតោន ដែលមាន៥៣៩.២៨១ជើងហោះហើរ ទម្លាក់នៅលើ ១២៥.៦៩៨ទីតាំង ក្នុងនោះមានគ្រាប់បែកចង្កោមចំនួនប្រមាណ៣០លានកូនគ្រាប់ និងសំណល់អាវុធគីមីមួយចំនួនផងដែរ។ ទីតាំងមួយចំនួននៅក្នុងទឹកដីកម្ពុជាយើង មិនអាចទាំងជីកអណ្តូងយកទឹកមកប្រើប្រាស់បានផង ដោយសារតែសារធាតុគីមីដែលបន្សល់ពីសង្គ្រាមបានសាយភាយ ហើយប្រជាជនខ្មែរយើងជាច្រើននាក់បានរងផលប៉ះពាល់ពីសារធាតុទាំងនោះ ។ 

ឯកឧត្តម ហេង រតនា បានកោតសរសើរដល់គ្រូបណ្តុះបណ្តាល និងសិក្ខាកាមទាំងអស់ដែលអោយយកចិត្តទុកដាក់ខ្ពស់ក្នុងវគ្គហ្វឹកហ្វឺននេះ ដើម្បីបានជាប្រយោជន៍សម្រាប់បម្រើការក្នុងកិច្ចប្រតិបត្តិការស្រាវជ្រាវក្នុងក្របខណ្ឌទូទាំងប្រទេសដែលទាមទារឱ្យមានជំនាញច្បាស់លាស់ ក្នុងការស្វែងរកប្រភពនៃទីតាំងទម្លាក់គ្រាប់បែក និងគ្រាប់បែកចង្កោម ដើម្បីធ្វើការវិភាគ និងចងក្រងជាទិន្នន័យថ្នាក់ជាតិសម្រាប់កិច្ចប្រតិបត្តិការបោសសម្អាត និងរក្សាសុខសុវត្ថិភាពដល់ប្រជាពលរដ្ឋទៅថ្ងៃអនាគត ៕ ដោយ ៖ កាំង ហុងវាស្នា