ភ្នំពេញ៖ មនុស្សរហូតដល់ទៅ ៧៨នាក់ បានស្លាប់បាត់បង់ជីវិត ហើយពលរដ្ឋដល់ទៅ ១២៩នាក់ទៀត បានរងរបួសដោយសារគ្រោះធម្មជាតិ និងគ្រោះអគ្គិភ័យនៅទូទាំងប្រទេសក្នុងរយៈពេល ៦ខែដើមឆ្នាំនេះ។
តួលេខនេះ ត្រូវបានបង្ហាញឱ្យដឹងនៅក្នុងរបាយាការណ៍មួយដែល BTV ទទួលបានពីលោក ឃុន សុខា មន្ត្រីនាំពាក្យនៃគណៈកម្មាធិការជាតិគ្រប់គ្រងគ្រោះមហន្តរាយនៅថ្ងៃនេះ។
របាយការណ៍ដដែលនេះ បានឱ្យដឹងទៀតថា ប្រទេសកម្ពុជាបានទទួលរងគ្រោះមហន្តរាយបង្កឡើងដោយធម្មជាតិរហូតដល់ ២០៨លើកនៅទូទាំងប្រទេសចន្លោះពីខែមករារហូតដល់ចុងខែមិថុនាកន្លងមកនេះ ក្នុងនោះគ្រោះថ្នាក់បង្កឡើងដោយរន្ទះបាញ់ បានកើតឡើងរហូតដល់ ៧០លើក។
បើរបាយការណ៍ដដែលនេះ គ្រោះមហន្តរាយធម្មជាតិនៅក្នុងរយៈពេល ៦ខែដើមឆ្នាំនេះ បានសម្លាប់មនុស្ស ៦៤នាក់ ក្នុងនោះពលរដ្ឋដល់ទៅ ៥៩នាក់ បានស្លាប់ដោយសារតែរន្ទះបាញ់ ហើយពលរដ្ឋ ៥នាក់ទៀត បានស្លាប់នៅក្នុងហេតុការណ៍ខ្យល់កន្ត្រាក់។
ក្រៅពីមនុស្សស្លាប់ របាយការណ៍នេះក៏បានឱ្យដឹងផងដែរថា ប្រជាពលរដ្ឋសរុបរហូតដល់ ១០០នាក់ផ្សេងទៀត បានរងរបួសនៅក្នុងគ្រោះថ្នាក់ធម្មជាតិ មានខ្យល់កន្ត្រាក់ និងរន្ទះបាញ់។
របាយការណ៍របស់គណៈកម្មកាធិការជាតិគ្រប់គ្រងគ្រោះមហន្តរាយ ក៏បានឱ្យដឹងផងដែរថា ខ្យល់កន្ត្រាក់ដែលបានកើតឡើងចំនួន ១៣៨លើកក្នុងរយៈពេល ៦ខែនេះ បានបំផ្លាញផ្ទះសម្បែងប្រជាពលរដ្ឋ និងសំណង់អគារសាធារណៈរហូតដល់ ៥ ៣១៣កន្លែង ក្នុងនោះមានផ្ទះសម្បែងពលរដ្ឋ ៦០០ខ្នង បានដួលរលំទាំងស្រុង ហើយផ្ទះសម្បែងពលរដ្ឋ ៤ ៥៦៥ខ្នងទៀត បានខូចខាតដោយអន្លើ។
របាយការណ៍នេះបានឱ្យដឹងថា គ្រោះថ្នាក់អគ្គិភ័យវិញ បានកើតឡើងរហូតដល់ ២៨៨លើកនៅទូទាំងប្រទេស ក្នុងនោះរាជធានីភ្នំពេញច្រើនជាងគេរហូតដល់ ៥៩លើក បន្ទាប់មកខេត្តបាត់ដំបង ២២លើក ខេត្តកណ្ដាល សៀមរាប និងខេត្តក្រចេះ ១៦លើកដូចគ្នា។
បើតាមរបាយការណ៍ដដែលនេះ គ្រោះអគ្គិភ័យ បានសម្លាប់មនុស្ស ១៤នាក់ និងបណ្ដាលឱ្យមនុស្ស ២៩នាក់ទៀត រងរបួសនៅក្នុងឆមាសទី១នៃឆ្នាំ២០២១នេះ។
គ្រោះអគ្គិភ័យ ក៏បានបំផ្លាញផ្ទះសម្បែង អគារឯកជន និងអគារសាធារណៈរហូតដល់ ៤៤៣កន្លែង ក្នុងនោះមានផ្ទះសម្បែងប្រជាពលរដ្ឋរហូតដល់ ៣២១ខ្នង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
